Gjendja e jashtëzakonshme 14-ditore përfundon të shtunën, dhe partitë ende nuk kanë marrëveshje për një datë të zgjedhjeve. Qeveria po vlerëson nëse do të kërkojë zgjatje të gjendjes së jashtëzakonshme. Nuk ka asnjë njoftim për një takim të ri të liderëve me Presidentin Stevo Pendarovski, pasi në dy takimet e mëparshme nuk arritën marrëveshje për caktimin e datës për zgjedhje, përcjell Telegrafi Maqedoni.

Qeveria insiston në zgjedhje në afatin e parë të mundshëm kur rreziku i përhapjes së infeksionit mbahet në minimum. Sipas LSDM-së, kjo është e nevojshme dhe e përgjegjshme, saktësisht për shëndetin e qytetarëve, për rifillimin e plotë të ekonomisë së Maqedonisë, por edhe për mbrojtjen e demokracisë përmes kontrollit të duhur të Qeverisë dhe ofrimit të institucioneve funksionale demokratike.

Kjo është arsyeja pse ata besojnë se zgjedhjet janë një zgjidhje, dhe jo një problem. Sipas tyre, koha e përshtatshme për zgjedhjet është para fillimit të verës, duke aluduar në datën e 21 qershorit. Zgjedhjet e shpejta, nga ana tjetër, nuk janë një zgjidhje për OBRM-PDUKM-në, por një problem. Ata akuzojnë se duke insistuar në zgjedhje në një kohë kur pandemia nuk është akoma e qetë, shëndeti i qytetarëve rrezikohet. Sipas tyre, që nga momenti i parë i pandemisë me coronavirusin, qeveria ka bërë politikë në vend të masave konkrete për të mbrojtur shëndetin e qytetarëve.

Ata mbeten në favor të zgjedhjeve në fund të gushtit ose shtatorit. Të dy palët thonë se janë të gatshëm për një konsensus dhe nuk e përjashtojnë mundësinë e një marrëveshjeje, megjithëse insistojnë se pala tjetër duhet të tërhiqet.