Sot në hapësirat e Ministrisë për Punë të Jashtme u mbajt mbledhje e Këshillit Strategjik për politikë të jashtme, kushtuar ngjarjeve aktuale në Afganistan dhe implikimeve të mundshme në vendin tonë dhe rajon. Në mbledhje, që u zhvillua në kuadër të projektit strategjik të MPJ-së -Reflektime 2030, fjalë hyrëse kishte Ministri i Punëve të Jashtme, Bujar Osmani i cili shkëmbeu mendimet e tij mbi temën dhe rezymoi rolin e Republikës së Maqedonisë së Veriut përkundrejt lëvizjeve gjeopolitike në Afganistan dhe më gjerë në rajon.

“Ngjarjet në Afganistan, por edhe konflikti i ngrirë në rajonin e OSBE-së tregojnë se pasiguria dhe papashikueshmëria mbeten karakteristikë dominuese në skenën ndërkombëtare dhe realitet sigurie. Fenomenet e njëjta do të vazhdojnë t’i diktojnë proceset globale politike dhe të sigurisë. Republika e Maqedonisë së Veriut si anëtare e plotfuqishme e NATO-s është kryesuese e ardhshme e OSBE-së, organizata më e madhe botërore në rajon për siguri paraqet hallkë në sistemin e sigurisë kolektive. Fakti se jemi aktor pro-aktiv në marrëdhëniet ndërkombëtare na mundëson të punojmë në zbatimin e agjendës sonë të sigurisë, por njëkohësisht edhe të pozicionimit si aktor përgjegjës në raportet ndërkombëtare. Ngjarja e sotme është pjesë e aktiviteteve të cilat i ndërmarrim në funksion të forcimit të gatishmërisë, parashikueshmërisë strategjike dhe përshtatshmërisë në drejtim të konfirmimit në kohë të drejtimeve politike për ndërmarrjen e veprimeve adekuate”, theksoi Ministri, Osmani.

Në takim, anëtarët e Këshillit Strategjik shkëmbyen qëndrime dhe ofruan ide për nevojën e planifikimit strategjik afatgjatë dhe formimin e mekanizmave për menaxhimin e lëvizjeve eventuale të shtuara të emigrantëve, ndërtimin e partneriteteve me aleatët edhe në kornizë të organeve multi-laterale, përdorimin e mekanizmave të BE-së dhe data-bazave përkatëse nga sistemi për azil dhe migracion, si dhe ndjekjen e rregullt të politikave të BE-së dhe vendeve anëtare në këtë sferë./Telegrafi/