Në prag të vendimit final për fillimin e negociatave me Bashkimin Evropian dhe hapjen e kapitujve, si dhe në rreth 100 ditë mandat të kësaj Qeverie, vendi nuk i ka akoma gati as ekipet negociatore.

Nga Sekretariati për Çështje Evropiane arsyetohen se janë në proces të përshtatjes së këtyre ekipeve me metodologjinë e re të anëtarësimit. Paralelisht, sipas tyre, bëhen edhe analiza në qeveri të cilat do të përdoren për riorganizimin dhe operacionalizimin e strukturës negociuese.

“Llogaria është se në procesin e negociatave në strukturën horizontale do të duhet të kyçen 1500-2000 nëpunës shtetëror dhe ekspertë në fushën e kapitujve, por duke pasur parasysh përvojën e vendeve të tjera, struktura do të duhet në vazhdimësi të përforcohet dhe plotësohet. Kjo sigurisht është e lidhur edhe me metodologjinë e re të negociatave për anëtarësim. Nga këtu, erdhi nevoja e patjetërsueshme për rishikimin e vendimeve dhe adaptimin adekuat të mekanizmave koordinuese për bërjen e këtyre negociatave”, thonë Sekretariati për Çështje Evropiane.

Pavarësisht interesimit të lartë të mediave, Sekretariati për Çështje Evropiane as gjatë mandatit të kaluar nuk ka treguar çfarë e pengon në formimin e këtyre ekipeve.

Ivan Stefanovski nga “Eurothink” thotë se tashmë duhet të dihet se cilët persona do të vendosen në pozita kyçe gjatë negociatave.

“Është e vërtetë se për të filluar negociata thelbësore duhet ta kemi strukturën e saktë negociuese të cilën për momentin nuk e kemi të kompletuar. Ne duhet të dimë saktë se cilët persona në cilat vende do të ulen dhe kush për çfarë do të jetë kompetent. Sekretariati, si bartës i këtij procesi, por edhe shteti në përgjithësi, të gjithë institucionet shtetërore, duhet të bëjnë gjithçka që është në fuqinë e tyre që të tërheqin kuadro sa më cilësore dhe profesionale…”, tha Ivan Stefanovski, Eurothink.

Arritjet e Sekretariatit në 100 ditët e para të mandatit, ata thonë se në detaje do t’i prezantojnë në Qeveri por mburren me zbatimin e suksesshëm të programimit të IPA 3, AF 2021 dhe 2022 dhe se kanë rishikuar listën e vetme të projekteve në sektorët transport, energjetikë, ambient jetësor, transformim digjital dhe sociale.

Ndërkohë në Kuvend, edhe pesë muaj pas zgjedhjeve, nuk është formuar akoma Këshilli nacional për eurointegrime, i cili është trup i rëndësishëm për monitorimin e procesit integrues të vendit. Në raportin e KE-së kërkohej të vazhdohet edhe me zbatimin e ligjeve, përveç miratimit të tyre. Para së gjithash u kërkua luftë e pakompromis ndaj korrupsionit, reforma në administratë, ndryshim i Kodit zgjedhor dhe politika efikase për mbrojtjen e ambientit jetësor./Alsat