Ministri i Punëve të Jashtme të Republikës së Maqedonisë së Veriut, Bujar Osmani, nga nesër do të qëndrojë për një vizitë pune në Konfederatën Zvicerane dhe Mbretërinë e Spanjës, njoftojnë nga MPJ.

“Gjatë qëndrimit të tij në Bern, ministri Osmani do të takohet me shoqata të shumta të qytetarëve dhe anëtarë të diasporës sonë nga të cilë do të kërkojë mbështetje për procesin e Regjistrimit 2021. Gjatë qëndrimit të tij në Zvicër, Osmani gjithashtu do të takohet me homologun e tij, ministrin federal të Punëve të Jashtme të Zvicrës Ignacio Cassis. Temë e bisedimeve do të jetë zhvillimi i përgjithshëm i marrëdhënieve midis dy vendeve, me një fokus të veçantë në ndihmën bilaterale të zhvillimit të Zvicrës për Republikën e Maqedonisë së Veriut.

Nga Zvicra, ministri Osmani udhëton në Madrid për t’u takuar me nikoqirin e tij, Ministrin e Punëve të Jashtme, Bashkimit Evropian dhe Bashkëpunimit të Spanjës, Arancha Gonzalez Laya. Në Madrid, Osmani do të takohet gjithashtu me Aurora Mejia, Drejtore për Bashkimin Evropian dhe Këshilltare Kryesore në Kabinetin e Kryeministrit Pedro Sanchez dhe do të takohet me Kryetarin e Komitetit të Marrëdhënieve me Jashtë të Senatit Antonio Gutierrez Limonesi. Theks kryesor i bisedimeve do të jenë marrëdhëniet dypalëshe, bashkëpunimin ekonomik dhe perspektivat evropiane të vendit”, thuhet në njoftimin e MPJ-së.

Nga atje theksojnë se gjatë qëndrimit të tij në Madrid, Osmani do të takohet me drejtorin e Organizatës Botërore të Turizmit Zurab Pololikashvili dhe do të ketë takime të ndara me përfaqësuesit e diasporës së Republikës së Maqedonisë së Veriut në Spanjë.

Vizitat e punës së Osmanit në Zvicër dhe Spanjë, thuhet në njoftim, janë pjesë e veprimtarive diplomatike për prezantimin e dosjes evropiane të vendit, por gjithashtu me qëllim edhe që të mobilizojë diasporën tonë për përfshirje në procesin e vetë-regjistrimit në kuadër të Regjistrimit 2021./Telegrafi/