Presidenti i Shqipërisë, Bujar Nishani, me ftesë të kryetarëve të komunave të Bujanocit dhe të Preshevës u nis të martën për të kremtuar 130-vjetorin e hapjes së mësonjëtores së parë shqipe dhe të Ditës së Mësuesit, me mësuesit, nxënësit dhe prindërit e shkollave shqipe të këtyre komunave.

Ashtu siç ishte paralajmëruar presidenti shqiptar në mesditë u gjet në mesin e shqiptarëve në sheshin “Skënderbe” në Bujanoc, i cili i prit nga homologu i tij shqiptar Shaip Kamberi, kryetar i Bujanocit.

Presidenti Nishani në shoqërim me këshilltarin e tij të lartë Fleamur Gashin agjendën e tyre të vizitës njëditore në Luginën e Preshevës e ka nisur nga takimi me nikoqirin Shaip Kamberi me të cilin ka biseduar për situatën aktuale politike dhe ekonomike në Bujanoc si dhe të drejtat e shqiptarëve në Luginë.

Në takim me presidentin shqiptar, pos Kamberit, mori pjesë edhe kryetari i KKSH-së Jonuz Musliu, kryetar i Kuvendit të Bujanocit , Fatmir Hasni deputet shqiptar në Parlamentin e Serbisë etj.

Mbi 300 gazetarë shqiptarë, serbë dhe botërorë, bashkë me 300 forca policore me uniformë e pa uniformë dhe snajperistë po ndjekin vizitën e presidentit shqiptar.

Gjatë qëndrimit në komunat e Bujanocit dhe Preshevës, Kreu i Shtetit më pastaj do të zhvillojë takime të veçanta me drejtuesit të këtyre komunave, do të vizitojë shkollën fillore të fshatit Tërnoc, si dhe do të marrë pjesë në aktivitetet e posaçme kulturore të organizuara nga komunat për këtë ditë të shënuar për shqiptarët.