Ndonëse pas raundit të negociatave në Vjenë, as ndërmjetësi i OKB-së, Nimic e as dy kryediplomatët, Dimitrov e Kocias nuk treguan se cilat ishin rezultatet konkrete të takimit, mediat greke publikojnë detaje.

Sipas TV Sky dhe Antena, Athina është tërhequr nga kërkesa për emër të pandashëm dhe të papërkthyeshëm, por se në kthim kërkon që emri të jetë erga omnes që do të nënkuptonte ndryshim të Kushtetutës dhe veçanërisht të Nenit 49 të saj. Kështu shkruan edhe e përditshmja Kathimerini.

Sipas burimeve diplomatike, pengesat kryesore janë nenet irredentiste të Kushtetutës së IRJM-së dhe emri që do ta përdorë në vend dhe jashtë vendit. Burimet e njëjta thonë se Athina do ta konsideronte marrëveshje nëse Shkupi ndryshon Nenin 49 të Kushtetutës, i cili u referohet qytetarëve nga IRJM-ja në diasporë, në mënyrë që të mos ketë irredentizëm – shkruan Ekathimerini.

Ndonëse ky informacion mbetet zyrtarisht i pakonfirmuar dhe i pa-përgënjeshtruar, është e paqartë se çfarë në të vërtetë do të mund të kërkonte pala greke. Neni 49 që parashikon se “Republika kujdeset për të drejtat e qytetarëve të Republikës jashtë vendit”, në vitin 1992 është plotësuar me Amendamentin II, sipas të cilit “Republika, me këtë rast, nuk do të përzihet në të drejtat sovrane të shteteve tjera dhe në punët e tyre të brendshme”.

Pas takimit të mbrëmshëm, mediat greke gjithashtu raportuan se Shkupi është i gatshëm për ndryshime kushtetuese. Por kjo nxiti reagime të menjëhershme të Ministrit, Dimitrov dhe Ministrisë së Jashtme greke.

Procesi i çështjes së emrit është në fazë delikate dhe spekulimet e disa mediave janë të dëmshme. Qëndroj pas deklaratës time publike dhe informoj opinionin se nuk kam bërë ndonjë brifing joformal shtesë – deklaroi Ministër i JashtëmNikolla Dimitrov.

Asnjë burim diplomatik e as ndonjë burim tjetër nuk ka thënë se pala e Shkupit është e gatshme të bëjë ndryshime të caktuara në Kushtetutën e vendit. Përmendja konkrete është provokim i qëllimshëm nga ana e secilës media që e ka përcjellë informatën konkrete – thhuhet nga Ministria e Jashtme e Greqisë.

Nga treshja e diplomatëve, Nimic-Dimitrov-Kocias takimi i mbrëmshëm u vlerësua si pozitiv dhe progresiv, por se megjithatë mbeten akoma vështirësi për t’u tejkaluar. U paralajmërua një takim tjetër pas Pashkëve, në të cilin sipas Kociasit pritet të hidhet “hapi i madh”. Ndërsa nuk përjashtohet mundësia që pos ministrave të jashtëm, të takohen edhe kryeministrat e dy vendeve.