Maqedoni, të martën vendoset nëse do të shpallet epidemi fruthi në gjithë shtetin

20:30 | 13 Prill 2019
Arbresh.info

Komisioni për sëmundje infektive të martën do të deklarohet nëse do të shpallë epidemi të fruthit në nivel të gjithë shtetit.

Paraqitja e rasteve të reja vazhdon akoma. Në javën e fundit u regjistruan 126 persona të prekur nga fruthi, që është numri më i madh deri tani, përcjell Telegrafi Maqedoni.

Thuajse gjysma prej tyre (57) janë në Shkup, ndërsa ka të prekur edhe gra shtatzëna, prej të cilave njëra ka humbur fëmijën në muajin e gjashtë. Deri tani nga fruthi janë sëmurë edhe mbi 100 punëtorë shëndetësor.

Ministri i Shëndetësisë Venko Filipçe, thotë se numrat nuk janë shqetësues, pasi epidemiologët kanë paraparë këtë dhe shtoi se kapacitetet e Klinikës Infektive dhe njërit departament të Klinikës së Fëmijëve në Kozle janë të gatshme të përballen me fruthin.

Ndryshe, organet kompetente apelojnë për vaksinim, sidomos të fëmijëve. Nga fillimi i epidemisë së fruthit në disa qytete, deri tani janë regjistruar 960 raste./Telegrafi/

Shpërndaje në rrjete sociale

Lajmet më të lexuara

Të ngjashme

Foto lajm