Shkruan: Fatmir M. Shatri (matematikan)

Një thënie e urtë thotë : ” Realiteti është mjaft i hidhur , por është realitet ” . Për të patë sukses në jetë , njeriu duhet patjetër ta njohu realitetin e gjendjes në të cilën jeton dhe vepron .

Aq sa është e arsimuar një shoqëri , të tillë do ta ketë edhe vetëdijen shtet formuese dhe nivelin e qeverisjes . Kur vendi ndodhet në tranzicion , siç është shteti i jonë , regjimet autokratike përpiqen ta mbajnë masën nën kontroll , duke përdorë metoda nga më të ndryshmet . Pushtetarët në vendin tonë janë specializuar në mënyrën se si duhet ta sundojnë popullin në mënyrë të pamëshirshme , duke mashtruar vazhdimisht . Njëra nga mënyrat më të rrezikshme për ta penguar emancipimin e shoqërisë , është edhe degradimi në maksimum i sistemit arsimor . Sa më shumë njerëz të shkolluar të ketë një shoqëri , aq më pak ka mundësi që politikanët zhvatës të mashtrojnë pjesëtarët e saj . Oligarkia kosovare e ka kuptuar mirë ketë parim , prandaj e ka krijuar një të vërtetë virtuale , sipas të cilës , shkollat po prosperojnë , mësimdhënia po shënon ngritje cilësore dhe thuajse nuk ka fare vend për kritikë .

Aq larg shkojnë administratorët tonë të pushtetit mafioz , saqë duan ta bindin opinionin si brenda ashtu edhe jashtë vendit , se jemi shumë afër standardeve më të avancuara evropiane . Mirëpo , realiteti nga terreni na tregon për një situatë mjaft të hidhur . Numër i madh i shkollave në shtetin tonë janë me performancë të mjerë , klasa të stërmbushura me nxënës , mësimi zhvillohet me metoda mesjetare , ka mungesë të madhe laboratorësh dhe mjetesh të konkretizimit etj . Mësimdhënësit dhe drejtuesit e shkollave në të shumtën e rasteve janë të emëruar me dirigjime partiake . Pra , kriteri i parë për punësim në shumicën e shkollave tona është të kesh dikë lart në qeveri , sepse fare lehtë të rehatojnë . Atyre që kanë përgatitje të larta akademike dhe që janë të shquar në fushat e tyre , në të shumtën e rasteve as që iu jepet mundësia për t’u punësuar . Konkurset shumë herë shpallën vetëm formalisht , sepse njerëzit që do të punojnë në vende të caktuara , janë përcaktuar që më parë . Kohëve të fundit , grupet e njerëzve që e kanë kapur pushtetin , kanë filluar të shkojë aq larg në shkeljen e ligjeve mbi arsimin e shtetit tonë , sa të mos shpallin fare konkurs për lëndë të caktuara për plotësim të vendeve të lira të punës nëpër shkolla , edhe pse nëpër ato pozita janë të sistemuar njerëz të pa kualifikuar .

Rastin më të freskët e kemi në Komunën e Istogut , e cila për kundër faktit se në gjimnazin ” Haxhi Zeka ” dhe shkollën e mesme profesionale ” Mithat Frashëri ” nuk e ka asnjë profesor të diplomuar të matematikës , nuk ka hapur fare konkurs për pranimin e personelit edukativo-arsimor për këtë lëndë . DKA si organ kompetent i kësaj komune , për mësimdhënës të matematikës ka pranuar njerëz pa përgatitje adekuate profesionale siç është paraparë me dispozitat normative që janë në fuqi . Mësimdhënësit e tanishëm të matematikës që punojnë në shkollat në fjalë , kanë të përfunduar studimet dy vjeçare në SHLP , apo drejtimin matematikë-informatikë , për t’u ri kualifikuar më vonë me normativën e re të arsimit , ku kanë vazhduar edhe një vit vijues .

Është shokues rasti i profesorit të diplomuar të matematikës , Osman ( Ibish ) Osmanaj , i cili ka lindur në ketë komunë dhe jeton edhe sot e kësaj dite së bashku me familjen në qendër të Istogut , shtëpinë e banimit te të cilit nga objekti i gjimnazit ” Haxhi Zeka ” e ndanë vetëm rruga . Profesor Osmani është i diplomuar në fakultetin e Matematikës , programi 4 ( katër ) vjeçar , në FSHMN të UP ” Hasan Prishtina ” në Prishtinë . Në të dy shkollat e mesme të larta , Komuna e Istogut nuk e ka asnjë mësimdhënës të matematikës , me përgatitje akademike sikurse profesor Osmanin .

Është e turpshme dhe për njerëzit e arsyeshëm e pa pranueshme loja me një perfiditet të madh që e ka bërë DKA e Istogut me profesorin në fjalë . Ata vitin e kaluar shkollor ( 2014 / 2015 ) e kishin shpallur konkursin për plotësim me kuadro në shkolla , në të cilin veç lëndëve tjera mësimore , figuronte edhe matematika . Pas intervistimit të kandidatëve dhe përzgjedhjes së tyre , profesor Osmani që në atë kohë e kishte provimin e fundit në fakultet ( Gjeometri diferenciale-lëndë semestrale ) të pa përfunduar , ishte refuzuar nga komisioni kompetent me arsyetimin krejtësisht banal – se vjen në konsideratë diploma e fundit e përgatitjes shkollore për punësim në vende të caktuara . Sipas kësaj logjike , profesor Osmani si absolvent i fakultetit që ishte në atë kohë , nga kompetentët e DKA të Istogut , konsiderohej si kuadër me kualifikim të mesëm , e diplomat e shkollave të larta ishin më të fuqishme se kjo .

Në këtë mënyrë , pas refuzimit nga DKA e Istogut , profesor Osmani për të mbijetuar ekonomikisht , detyrohet që të punoi në një kompani kanadeze , e cila i kishte zyrat në Prishtinë . Profesorit në fjalë i duhej çdo ditë të udhëtonte nga Istogu për të punuar në Prishtinë . Mirëpo kjo kompani në fillim të vitit 2015 , e mbyllë zyrën në Prishtinë dhe tërhiqet nga Kosova , e tani profesor Osmani mbetet i pa punë . Ndërkohë e përfundon provimin e mbetur në fakultet , e punon punimin e diplomës dhe e mbron atë para komisionit përkatës . Si i diplomuar në Fakultetin e Matematikës , profesor Osmani për të siguruar ekzistencën , detyrohet të punoi punëtor fizik në cilësinë e argatit nëpër Istog , e në vend të tij në të dy shkollat e mesme të larta të punojnë mësimdhënës të pa kualifikuar . Për ta vazhduar edhe më shumë paturpësinë DKA e Istogut , këtë vit në konkursin e shpallur nuk e fusin fare lëndën e matematikës . Edhe përkundër përpjekjeve të mëdha të profesor Osmanit që të përmirësohet gabimi i bërë i DKA në fjalë , dhe të sistemohet edhe ai në vendin e merituar , një gjë e tillë nuk ka ndodhur . Gjatë kontakteve që profesori i ka patë me zyrtarët e Komunës së Istogut dhe në veçanti të DKA gjegjëse , çdo herë ka marrë të njëjtën përgjegjje -“unë nuk di asgjë se kështu më është urdhëruar nga lart ” . Pas këtyre lojërave të ndyta , profesori është detyruar të denoncoi DKA të Istogut duke bërë ankesë në zyrat gjegjëse të sektorit të Inspektoratit të Arsimit në Pejë , por çdo gjë për momentin ka përfunduar pa sukses , sepse ende ky institucion nuk ka reaguar fare për skandalin në fjalë .

Është për keqardhje edhe mos reagimi i medieve për rastin e këtij profesori , edhe përkundër faktit se ai i kishte informuar për veprimin kriminal të DKA të Istogut . Pas krejt kësaj loje të ndytë që ia kishte bërë Komuna e Istogut , profesor Osmani detyrohet që për t’i ikur punës si argat me diplomë të fakultetit në xhep , të shkoi dhe të konkurroi në Klinë – 25 kilometra larg shtëpisë ku jeton . DKA e Klinës e ka mirëpritur profesorin në fjalë dhe e ka sistemuar si PROFESOR I MATEMATIKËS në gjimnazin “Luigj Gurakuqi “. Për aktin burrëror që e bëri ky institucion , ne si matematikanë kemi obligim moral që ta falënderojmë përzemërsisht , sepse pjesëtarin e komunitetit tonë e largoi nga puna si argat dhe e sistemoi në vendin që e meriton . Tani profesor Osmanit i duhet që çdo ditë të bëjë nga pesëdhjetë kilometra rrugë ( shkuarje dhe ardhje ) për në vendin e tij të punës , e nga objekti shkollor i gjimnazit ” Haxhi Zeka ” shtëpinë e tij e ndanë vetëm rruga .

Në qoftë se e analizojmë në esencë rastin e profesor Osmanit , nuk duhet shumë mundim për të ardhur në përfundim për një realitet të hidhur të një gjendje të mjerë në të cilën gjendet shteti i jonë . Gjendja e tillë është krijuar pikërisht nga personat që janë emëruar në saje të një rrjeti oligarkik , klientist , që i është nënshtruar dhe i jep llogari vetëm politikës së inkriminuar . Sistemi i kalbur i drejtësisë kosovare është ndër plagët më të thella të shoqërisë dhe shtetit tonë . Me mjaft vonesë , opinioni publik , disa opozitarë , shoqëria civile , ndonjë media që ka mbetur ende e pavarur , po e kuptojnë se sa shumë është degraduar sundimi i ligjit në Republikën e Kosovës . Nuk do të kemi asnjëherë organe të mirëfillta shtetërore , nëse politika ka qasje në punët e tyre . Pra , 16 vjet pas përfundimit të luftës , rreth dy milionë kosovarë vazhdojnë t’u nënshtrohen të fortëve të politikës , të cilët me mjeshtëri mjaft të madhe kryejnë vepra të ndryshme kriminale . Kosova nuk do të duhej të kishte asnjë problem me administratën publike as me sundimin e ligjit , kur kihet parasysh se sa donacione miliardëshe janë dhënë nga SHBA-ja , Evropa e vende të tjera për ndërtim kapacitetesh . Sasi e madhe e mjeteve financiare është derdhur në emër të forcimit të demokracisë , forcimit të ligjit , forcimit të sistemit arsimor te të gjitha niveleve si dhe rregullim të objekteve shkollore e pajisje të tyre me mjete të ndryshme të konkretizimit . Por sot Kosova , jo vetëm që është vendi më i varfër në Evropë , por edhe me sundim të ligjit dhe të demokracisë është në fund të pusit . Pushteti i UNMIK-ut dhe pushtetet tona kleptokratike i avulluan paratë e donatorëve ndërkombëtar , siç shpenzuan dhe shpenzojnë edhe sot e kësaj dite paratë e taksapaguesve kosovarë . Në emër të reformave në administratë , gjyqësi , prokurori , shëndetësi , arsim , kulturë etj , u gëlltitën me qindra e miliona euro e kapacitetet nuk u ndërtuan , por u degraduan skajshmërisht nga ky pushtet i papërgjegjshëm .

Si përfundim të krejt asaj që shtjelluam më sipër , duke analizuar rastin rrëqethës të profesor Osman Osmanajt , mund të përfundojmë se pushteti aktual i Komunës së Istogut , e ruan me fanatizëm të pashoq traditën e lashtë që ka patë kjo komunë për persekutimin dhe përndjekjen e kuadrove cilësore dhe duke punuar me analfabetë në kuptimin profesional , në të kaluarën duke e përdorë Komitetin e Partisë Komuniste të Jugosllavisë , e tani duke manipuluar me konkurse për punësim . Me fjalë tjera , pushteti aktual i kësaj komune ende udhëhiqet me parullën famëkeqe serbe , sipas të cilës ” njerëzit më të ndershëm nga shqiptarët e Kosovës janë çobanët e maleve “. Mjerisht , ky pushtet i kësaj komune është pjesë e atij pushteti të papërgjegjshëm dhe të korruptuar , të cilët në administratë , drejtësi , arsim e kudo tjetër , ka të punësuar njerëz me lidhje nepotike , familjarë e militantë të partive . Kësaj kaste politike dhe këtyre pushteteve të papërgjegjshme dhe të korruptuara skajshmërisht , u ka interesuar vetëm se si të pasurohen për vete , për familjarët dhe klanet e tyre , e fare nuk janë brengosur për qytetarin . Të gjithë duhet të bindemi se për sa kohë që në krye të vendit të jenë partnerët e zhytur në korrupsion sistematik dhe zhvatjen e shtetit , as drejtësi ,as arsim , as shëndetësi ,as asgjë cilësore nuk do të ketë .

Fatkeqësisht , edhe qytetarët sikur janë pajtuar me ketë situatë . Askush nuk e ngritë zërin e arsyes për të protestuar kundër padrejtësive , por çdo gjë përfundon nga ata vetëm me ndonjë shfryrje në ” Facebook ” . Duhet ta dimë të gjithë se për sa kohë do të riciklojmë liderë të urryer , zhvatës , që kanë ndërtuar një sistem shtetëror korruptiv , nga më famëkëqijtë në botë , nuk ka shpresë për një jetë më të mirë . Problemi është se kjo e keqe , e shkaktuar nga sundimtarët kosovarë të pasluftës , i ka lëshuar rrënjët thellë deri në majën e shtetit . Asnjë sektor nuk ka shpëtuar pa u infektuar . Si rrjedhim i kësaj , sot mijëra nxënës dalin nga shkolla me diploma por me dije mjaft të kufizuara , studentët përfundojnë fakultetin , por shumica prej tyre janë të paaftë për tregun e punës . Sot bëhet profesor kush ka lidhje me partitë dhe jo ai që plotëson kriteret , e drejtor bëhet njeriu i paaftë për menaxhim me institucionin gjegjës , por që është bir besnik i partisë apo servil i ndonjë lideri zaptues .

Krejt për fund , urojmë që shoqëria jonë të zgjohet nga ky gjumë i thellë që e ka kapluar , të vetëdijesohet për t’u treguar një herë e përgjithmonë politikanëve të korruptuar , se nuk mund të manipulojnë me vullnetin për ndryshim , sepse realiteti ekzistues në të cilin jetojmë e që është mjaft i hidhur , nuk mund të ndryshohet me anë të rrjeteve sociale , por me punë serioze dhe largim njëherë e përgjithmonë nga skena politike dhe pushteti të kësaj fare të keqe që e degraduar skajshmërisht dhe e ka përdhosur shtetin tonë .