Formimi i qeverisë nuk është thjeshtë procedurë mandatimi nga presidenti dhe formalitet votimi në Kuvend. Formimi i qeverisë është para së gjithash proces politik në iniciativën dhe direktivën e fituesit të zgjedhjeve për ta bërë shumicën parlamentare. Ky proces politik i ndërtimit të shumicës parlamentare nuk zhvillohet si ndonjë procedure kushtetuese e juridike, por është vullnet i partisë fituese që me partitë e tjera të ndërtojë ujdi, marrëveshje dhe koalicione mbi parime, vlera e intetesa reciproke politike që mundësojnë krijimin e shumicës parlamentare dhe ndërtimin e qeverisë. Ky proces politik nuk ka kufizime juridiko-kushtetuese dhe as nuk mund të ketë, sepse kushtetuta nuk imponon, nuk pengon e as nuk orienton relacione politike mes partisë fituese dhe partive tjera në synimin e tyre për ta bërë qeverinë. Kushtetuta definon vetëm një gjë në këtë proces politik, të drejtën e pashmangshme të fituesit të zgjedhjeve për ta bërë qeverinë. As nuk ka përcaktuar parime politike, as afate kohore dhe as kushte të tjera.

– Në situatën të cilën ndodhemi, ku presidenti po zbaton standart të dyfishtë e nuk po e ushtron detyrimin kushtetues për ta shpërndarë kuvendin si pasojë e realizimit të mocionit kundër qeverisë, siç ka bërë vet ai dhe presidentët paraprak në raste të njejta, por po konsideron se krijimit të qeverisë duhet t’ia nisim nga e para si procedurë, sikur pas zgjedhjeve, atëherë sërish rregulli mbetet i njejtë: presidenti nuk mund t’i imponohet fituesit të zgjedhjeve se si, me kë dhe kur duhet ta bëjë qeverinë.

Kjo është çështje marrëveshjesh politike e jo imponimesh presidenciale. Partitë mund të mos merren fare vesh me fituesin dhe vendi sërish shkon në zgjedhje. Por, duke qenë se partitë që e rrëzuan qeverinë Kurti treguan se nuk duan të jenë pjesë e qeverisë me Vetëvendosjen, atëherë ato kanë vetëm dy mundësi: ta mbështesin vullnetin e fituesit për të shkuar në zgjedhje të reja; ose t’ia shprehin vullnetin Vetëvendosjes që edhe të papërfshira në qeveri do ta votojnë një qeveri tjetër të saj. Deri atëherë, pra deri kur presidenti të reflektojë, e drejta kushtetuese e fituesit për ta bërë qeverinë e re do të mbetet në proces, ndërkohë që qeveria në detyrë i vazhdon punët. Vetëvendosje do t’i përgjigjet presidentit atëherë kur asaj t’i përgjigjen partitë e tjera për drejtimin që i duhet dhënë mënyrës se si duhet bërë qeveria e re: përmes një shumice të re të bërë nga fituesi i zgjedhjeve apo përmes zgjedhjeve për ta rikonfirmuar fituesin e ri legjitim. Meqë partitë e PLAN-it e kontestuan këtë legjitimitet të Vetëvendosjes me mocion, atëherë rruga e vetme kushtetuese mbeten zgjedhjet e reja.
– Çdo devijim nga kjo rrugë do ta prodhojë një qeveri jokushtetuese (pra të paqenë, nul) dhe një president antikushtetues (pra që duhet shkarkuar apo dorëhequr).