Karriget plastike janë zgjedhja e parë për shumë njerëz kur kërkojnë mobilie kopshti – nuk është çudi, sepse ato janë të lehta, rezistuese ndaj shiut dhe të lira

Megjithatë, ka edhe një anë negative – nëse nuk i mirëmbani rregullisht, papastërtitë ngjiten lehtësisht në to.

Për shkak të veprimit të diellit dhe reshjeve, së shpejti do të duken të vjetra dhe të konsumuara.

Nëse kësaj i shtoni njollat e barit dhe baltës, lëngjet nga gjethet dhe pemët, madje edhe jashtëqitjet e shpendëve, karriget tuaja të reja plastike me shkëlqim mund të duken shumë keq.

Kjo është arsyeja pse është e rëndësishme t’i hiqni këto njolla sapo t’i vini re, transmeton Telegrafi.

Vetëkuptohet që duhet t’i fshini herë pas here me një leckë të lagur dhe t’i thani mirë. Megjithatë, duhet të bëni edhe një gjë kur i “paketoni” njëra mbi tjetrën – pastroni edhe karriget nga poshtë, sepse në përforcimet plastike shpesh fshihen merimangat dhe insektet e tjera.

Për pastrim “të përgjithshëm”, përgatitni një përzierje të uthullës alkoolike dhe ujit në një raport 3:1. Hidheni në një shishe spreji, spërkatni karriget dhe prisni dhjetë minuta.

Tani bëni një sapun të butë nga detergjenti i enëve dhe uji i vakët – rreth 3 lugë gjelle për 3 litra ujë të vakët. Fërkoni karriget me këtë përzierje dhe nëse nuk mund të hiqni disa njolla, përdorni sodë buke.

Asnjëherë gjatë pastrimit mos përdorni lëndë gërryese. Kjo do të bënte vetëm gërvishtje të vogla në plastikë, e cila do të mbajë më shumë papastërti më vonë.

Shpëlajini mirë karriget me zorrë uji dhe, nëse janë të pastra, thjesht thajini me një leckë mikro dhe jepini një lustrim të imët. Nëse ka ende njolla, bëni një zgjidhje të re pastrimi. Hidhni gjysmë gote zbardhues në 3 litra ujë të vakët, përzieni mirë dhe fërkoni njollat me një sfungjer të lagur në këtë tretësirë.

Lërini të qëndrojnë për dhjetë minuta dhe më pas lajini. Thani ato me kujdes me një leckë mikro. Nëse jeni të kënaqur me pamjen e karrigeve, mund t’i mbroni ato nga papastërtitë duke aplikuar dyll makine. Aplikoni një shtresë shumë të hollë dhe lëroni mirë. /Telegrafi/