Gratë kanë luftuar për barazi për qindra vjet, ndërsa po vjen një fazë ku fenomeni i pabarazisë ka filluar të ulet, dhe dukshëm nuk është zemërimi që dikur është përdorur si faktor kyç. Armët e tyre më të forta, me të cilat janë ndeshur që në krye të herës, qofshin këto protestat e hapura, por edhe ideologjitë, janë shfaqja më dinjitoze e femrave që luftojnë për të vendosur pozitat e tyre në vend. Diçka që “lexohet” dukshëm edhe në botën e modës, çka i ka bërë modelet, por edhe stilistët me peshë, të ngrenë pikëpyetje se: a është vërtet moda një qasje feministe?!

Megjithatë, bota drejtohet ende nga burrat!

Diçka e tillë është thuajse e pamohueshme dhe ndihet në ajër edhe në realitetin shqiptar. Politika dominohet nga seksi i kundërt, disa nga bizneset apo mediat më të rëndësishme në vend drejtohen nga burrat, e gjithaq edhe në fushën e modës, është e dukshme po e njëjta prirje. Por, shembujt që vijnë nga perëndimi, janë më të shumta e kuptimplota! Wall Street ka plot njerëz me influencë në tregjet financiare me drejtues të kompanive me fitime globale marramendëse, që drejtohen nga burrat. Industria e modës, është gjithashtu një sipërmarrje multimilardëshe që prek jo vetëm tendencat, por edhe artin. Dhe ajo drejtohet në pjesën dërrmuese të saj po nga burrat! Por, a duhet industria e modës të ndryshojë pajtueshmërinë për të përmbushur standardet e shoqërisë moderne? Ne të gjithë kemi fizik të ndryshëm, forma, gjatësi dhe aspekte të vetes që na përndjekin kudo si hije…

Disa vjet më parë, Karl Lagerfeld, fytyra përfaqësuese e shtëpisë së modës “Chanel”, ka thënë se Adel, këngëtarja e njohur është pak a shumë një masë “yndyrore” mbi skenë. Ajo është grua e shëndetshme, e cila identifikohet me reputacionin e suksesit prej kohësh, ka fituar çmime të shumta në karrierën e saj muzikore, por mendimi i Lagerfeld nuk mat talentin dhe vokalin, por pamjen e saj të jashtme! Po ky stilist prezantoi në pasarelat e modës koleksione veshjesh stofi me cirka, të frymëzuara nga tendencat e fundit dhe të kombinuara dukshëm me doza feminizmi. Modelet me pankarta në duar, me fraza si “Zonja e parë” dhe “Historia ime është historia juaj”, që protestonin me megafon bën namin asokohe. Edhe pse ky ishte një hap i mirë në drejtim të feminizmit komercial, shtëpia e modës përfitoi jashtëzakonisht shumë nga publiciteti dhe lajmet në media të këtij show në pasarelë. Moda që në krye të herës preku dukshëm feminizmin, por pak më vonë ajo u kthye në histori për të gjithë.

Natyrisht, modelet nuk janë aktiviste, por është e thënë që ky të jetë brezi i të rinjve përtej vitrinave të dyqaneve. Problemi është se kjo luftë vjen vetëm me faza, si nevoja për feminizëm, që duket se ka një ndikim jo të vogël në industrinë e modës. Punonjëset e atelieve, apo ato në fabrikat anekënd botës ku prodhohen veshje apo çanta dhe aksesorë të markave të njohura, janë ende të keq paguara, dhe jetojnë në varfëri. 14-16 orë në ditë punë me pagesa minimale, ku edhe sindikatat nuk bëjnë punë! Një pakicë prej tyre janë edhe fizikisht të abuzuara, dhe janë të paafta për t’i dërguar fëmijët e tyre në shkollë që të marrin arsim.

Kjo anë e modës, është e fshehur nga publiku, por kur është fjala për vëmendjen tonë në koleksionet e reja të veshjeve, ato kanë një forcë shtytëse të jashtëzakonshme për t’i kushtuar interes në gjithë format e mundshme. Shumë gra shohin revistat e modës në faqet e mbushura plot me fotot e femrave të bukura dhe modeleve të alta modës, si burim fuqizimi dhe frymëzimi. Artikujt mbi gratë e suksesshme, dhe arritja e madhështisë në fushat e tyre janë një tjetër anë e medaljes. Feminizmi ka të bëjë me rritjen e mundësive të zgjedhjes në dispozicion të grave në të gjithë botën, duke hequr kufizimet e diktuara në mënyrë të veçantë nga seksi. Prandaj, feminizmi nuk është i përputhshëm në kuadrin e industrisë së modës, pasi të dy si sektorë janë duke luftuar dukshëm në kahe dhe objektiva të ndryshme.