Dhembjet dhe shtangimi i qafës dhe në pjesën qafore të kurrizit, të cilat ndonjëherë janë shkaktarë të dhembjeve të forta të kokës, janë simptoma më të shpeshta të grumbullimit të stresit në trup.

Shumica e njerëzve pjesën më të mirë të ditës e kalon duke qëndruar ulur në pozitë të kërrusur dhe prandaj nuk është për t’u habitur që pikërisht problemet janë mu në atë pjesë të trupit, bashkë me dhembjet në pjesën e poshtme të shpinës, aktualisht pengesa më të shpeshta shëndetësore, transmeton Telegrafi.

Kur dhembja pushon, ju rekomandojmë t’i bëni këto pesë ushtrime të lehta në mënyrë që të zvogëloni presionin në qafën dhe kurrizin tuaj.

Secilën nga pozitat e përmendura është e nevojshme t’i përsëritni tri deri në pesë herë.

Shtrirja anash e qafës

Uluni me këmbë të kryqëzuara. Duke marrë frymë me dorën e majtë kapni veshin e djathtë dhe duke nxjerrë frymën lehtë shtrijeni anën e djathë të qafës, duke mbajtur supin e djathtë sa më ulët.

Përsëriteni 3 – 5 herë dhe ndërroni anët.

Kthesa në pozitën ulur

Me këmbë të kryqëzuara, shuplaka e majtë vendoset në gjurin e djathtë, ndërsa shuplaka e djathtë në dysheme pas bishtit.

Kur merrni frymë kurrizi zgjatet, ndërsa kur nxirrni frymën torzoja lehtë rrotullohet djathtas, duke orientuar shikimin sipër supit të djathtë. Përsëriteni 3 – 5 herë, pastaj ndërroni anët.

Pozita Gomukhasana

Gjuri i djathtë mbi të majtin. Kur merrni frymë ngrihet dora e majtë, kur nxirrni frymën shuplaka e majtë vendoset në shpinë, pas shpatullave. Kur merrni frymë dora e djathtë rrotullohet pas shpine dhe kur nxirrni frymën kapet shuplaka e majtë në nivel të shpatullave. Gishtat kapen.

Bashkë me supet e lëshuara ngrihet shikimi hapet pjesa e parë e qafës dhe shtrihet kurrizi. Mbani 3 – 5 minuta frymën dhe nxirreni. Në versionin tjetër mjekra lëshohet në koshin e kraharorit, ndërkaq torzoja lëshohet në drejtim të gjunjëve. Ndërroni këmbët dhe përsëriteni me dorën tjetër.

Tigri apo macja

Shuplakat janë në gjerësi të supeve dhe barten në dysheme, ndërkaq gjunjët një gjerësi të kërdhokullave.

Duke lëshuar kërthizën në drejtim të dyshemesë, kur merrni frymë hapet koshi i kraharorit dhe shikimi shkon në drejtimin lart (tigër), derisa kur nxirrni frymën, kërthiza tërhiqet në drejtim të kurrizit, ndërkaq mjekra lëshohet në drejtim të gjoksit, duke zgjeruar hapësirën midis shpatullave (macja).

Matsyasana (pozita e peshkut)

Me këmbë të shtrira dhe shputa të bashkuara, mbështeteni në bërryla dhe në llërë. Shuplakat janë nën vithe. Hapni dhe ngrini koshin e kraharorit, ndërkaq kokën e lëshoni në drejtim të dyshemesë, duke zgjatur dhe lëshuar qafën.

Qëndroni në këtë pozitë 5 – 8 marrje fryme dhe nxjerrje fryme. Relaksohuni në pozitë shavasane disa minuta. Kënaquni në dhomën tuaj të ndejës me rutinën e ushtrimeve! /Telegrafi/