Në eventin e mbajtur pak minuta më parë, kompania Jug-Koreane, LG ka prezantuar telefonin më të ri LG G4.

LG G4 do të ketë ekran me madhësi prej 5.5 inçëve dhe rezolucion Quad HD me 1440×2560 piksela. Për të ofruar një performancë të mahnitshme, LG ka zgjedhur procesorët nga Qualcomm, Snapdragon 808 me gjashtë bërthama, që së bashku me 3GB RAM ofron performanca tepër të mira. G4 do të ketë një grafikë 20% më të shpejtë duke mbështetur kështu videot me kualitet të lartë deri në 4K.

Për të krijuar një eksperiencë më të mirë, LG G4 ka sjellur një telefon që është shumë i bukur dhe i përshtatshëm për përdoruesit. Përveç kësaj, LG G4 ofron një bateri prej 3000 mAh, e cila ndryshe nga telefonat e tjerë të fundit mund të largohet për t’u zëvendësuar, transmeton arbresh.info.

Është e vështirë për ta imagjinuar, por LG G4 ka mbështjellëse të lëkurës, të cilat janë të një kualiteti tepër të lartë dhe vijnë në shumë ngjyra duke e bërë pajisjen vërtetë të veçantë. Megjithatë nuk është vetëm lëkura ajo që LG përdor si mbështjellëse të telefonave, ngase pajisja e fundit do jetë e ndërtuar edhe nga metali.

Çështja më kritike tek telefonat e mençur është fokusi i kamerës, por me LG G4 ju mund të shkrepni foto shumë më shpejtë me funksionin ‘Quick Shot’. Ndryshe nga pajisjet e tjera, LG G4 ofron stabilitet shumë më të mirë tek fotot ku ndriçimi është përmirësuar dukshëm. G4 ka kamerë 16 megapikselë, por për të ofruar një kamerë speciale për ‘selfie’, LG G4 ka sjellë një kamerë frontale prej 8 megapikselë, e cila ofron fotografi me kualitet të ngjashëm me fotografitë e bëra me kamerën kryesore nga telefonat e kompanive tjera. Gjithashtu G4 do të jetë telefoni i parë i cili do ta ketë sensorin e ngjyrave, duke e bërë kështu ndoshta telefonin më të mirë të prezantuar gjatë këtij viti për kualitetin e kamerës dhe fotografive të bëra me të.

Android 5.0 Lollipop do të jetë sistemi operativ i këtij telefoni. Gjithashtu çdo pronari të LG G4 falë bashkëpunimit me Google, do ti ofrohen 100GB hapësirë shtesë në Google Drive./arbresh.info/