Në faqen zyrtare të Dhomave të Specializuara në Hagë është bërë e ditur se Zyra e Prokurorit të Specializuar (ZPS) e ka dorëzuar versionin e redaktuar publik të dosjes paraprake në çështjen kundër Hysni Gucatit dhe Nasim Haradinajt.

Sipas ZPS-së, provat e përcaktuara në dosje tregojnë se gjatë një periudhe prej 19 ditësh, gjatë tre konferencave për shtyp, paraqitjet në mbi pesëmbëdhjetë programe televizive dhe postimet e shumta në mediat sociale, të akuzuarit dhe të tjerët, adaptuan një model të qëndrueshëm të sjelljes kriminale që dëmtoi dëshmitarët dhe pengoi procedurat Dhomave të Specializuar.

“Të akuzuarit ndërmorën secilin prej veprimeve të tyre derisa patën dy pozicione të larta në një organizatë të përbërë nga qindra, nëse jo mijëra, ish -pjesëtarë të UÇK -së. Të akuzuarit duhet të mbahen përgjegjës për krimet e rënda që kanë kryer, provat e të cilave janë kapur kryesisht pa mëdyshje në kamera. Kjo dhe provat e tjera që do të paraqiten në gjykim do të vërtetojnë, përtej dyshimit të arsyeshëm, përgjegjësinë e të akuzuarit për krimet që akuzohen”, thuhet në dosjen e ZPS-së.

Dosjen paraprake të prokurorisë për këtë rast mund ta lexoni këtu: https://repository.scp-ks.org/LW/Published/Filing/0b1ec6e9809e69f5/Public%20redacted%20version%20of%20%E2%80%98Specialist%20Prosecutor%E2%80%99s%20Pre-Trial%20Brief%20in%20the%20case%20against%20Hysni%20GUCATI%20and%20Nasim%20HARADINAJ%E2%80%99.pdf

Hysni Gucati, së bashku me Nasim Haradinajn, po akuzohen për vepra penale kundër administrimit të drejtësisë, konkretisht për pengim të personave zyrtarë në kryerjen e detyrave zyrtare, për frikësim të dëshmitarëve, për hakmarrje dhe për shkelje të fshehtësisë së procedurës, raporton “Betimi për Drejtësi”.

“Akuzat e paraqitura në aktakuzën e konfirmuar mbështeten në dyshimin e bazuar mirë se së paku midis 7 dhe 25 shtatorit 2020, z. Gucati dhe z. Haradinaj zbuluan pa autorizim informacion të mbrojtur prej Ligjit të Dhomave të Specializuara, ndër të cilat të dhëna identifikuese të disa dëshmitarëve (të mundshëm), në tre konferenca shtypi dhe aktivitete të tjera të transmetuara, si edhe përmes shpërndarjes së mëtejshme ku përfshihen deklaratat në rrjetet sociale”, thuhej në njoftimin e Dhomave të Specializuara.

Gucati dhe Haradinaj ngarkohen se kanë bërë komente nënçmuese kundër dëshmitarëve të mundshëm dhe në mënyrë të përsëritur shprehen synimin e tyre për të dëmtuar punën e Dhomave të Specializuara.

“Me këto veprime, z. Gucati dhe z. Haradinaj shkelën fshehtësinë e procedurës dhe frikësuan dëshmitarë (të mundshëm) të Zyrës së Prokurorit të Specializuar dhe si pasojë penguan punën dhe hetimet e ZPS-së.”, thuhej në njoftimin e Dhomave të Specializuara të Kosovës.