Në fshatin Zhegovc të komunës së Gjilanit është mbajtur ushtrimi fushor “Kampi veror 2017”, me kadetët e rinj të Forcës së Sigurisë së Kosovës.

Në këtë ushtrim kanë marrë pjesë rreth 50 kadetë, shkruan arbresh.info

Ushtrimi është përcjell nga oficerët e FSK-së dhe këshilltarët e NATO-s për FSK-në dhe komandanti i kampit amerikan “Bondsteel”.

Qëllimi i këtij trajnimi ishte taktika dhe lidershipi, që ka një karakter vlerësues.

Pjesëmarrës në këtë ushtrim janë gjenerata e vitit të pare, të dytë, të tretë dhe gjenerata e vitit të katërt.

Ky trajnim ka filluar me 5 qershor dhe do të zgjasë dy javë.

Ndërsa zëvendës ministri i FSK-së, Muhamet Latfi I ka ndarë mirënjohje komandantit të ushtrisë amerikane në Bondsteel, Corwin Lusk për kontributin e dhënë për FSK-në.

“Faleminderit ushtrisë amerikane për ndihmën dhe angazhimin e dhënë në forcimin dhe zhvillimin e FSK-së. Kjo është një certifikatë mirënjohje nga Ministria e Forcës së Sigurisë së Kosovës dhe FSK-së”, ka thënë Latifi.

Ai më tej ka shtuar se gjatë këtij demonstrimi të ushtrimeve të gjithë kadetët janë testuar në të gjithë fushat.

“Në Qendrën Universitare të kadetëve të rinj është bërë demonstrimi i të gjitha ushtrimeve, të gjithë kadetët janë testuar në gjithë ato mësimet që i kanë arritur përgjatë këtyre viteve dhe na gëzon fakti që të gjithë kadetët e kanë kaluar testimin me sukses të shkëlqyer ”, ka thënë Latifi.

Ndërsa Komandanti në ushtrinë amerikane në Bondsteel, Corwin Lusk ka inkurajuar ushtarët që të marrin pjesë në Kampin Veror të Kadetëve, sepse në këtë mënyrë ata do të mësojnë për lidershipin qysh në rini.

“Do të inkurajoja ushtarët tuaj apo kadetët tuaj brenda OTC, edhe pse është e vështirë, është e rëndësishme që lidershipi të mësohet sa jeni të rinj dhe vazhdon të rritet”, është shprehur komandanti.

Ai më tej ka lavdëruar ushtrimin e kryer, ku ka thënë se ishte një ushtrim I mirë, si dhe I mirë përgatitur, ku është treguar përkushtimi.

“Ishte një ushtrim shumë i mirë, i përgatitur mirë dhe që tregon përkushtimin dhe sa e vështirë është të punosh që të bësh dicka të funksionojë”, ka thënë Lusk.

Ndërsa Gjenerali I Brigadës së Forcave Tokësore, Gzim Hazrolli ka thënë se është një ushtrim vjetor ku secili kadet vlerësohet veç e veç në shumë fusha të trajnimit.

“Është një prej ushtrimeve vjetore të gjithë atij mundi që është bërë në përgatitjen e kadetëve, ku secili kadet vlerësohet veç e veç në shumë fusha të trajnimit por gjithsesi fusha më kryesore është lidershipi dhe marrja e vendimit dhe demonstrimi i të gjitha ato aftësive në teren. Secili kadet e ka për obligim që të arrijë një nivel të arritshmërisë dhe ky është një kriter që i përgatit që të jenë të gatshëm dhe të fillojnë të udhëhiqen me trupa të ardhshëm”, ka thënë Hazrolli./Arbresh.info/Blerta Agushi