Kryetari i Partisë Euroatlantike Milaim Zeka është deklaruar lidhur me koalicionet e mundshme para dhe pas zgjedhore që PEK mund të ketë. Zeka, ka konfirmuar se partia e tij do të garojë si e vetme në zgjedhje parakohshme, derisa ka mohuar se ka vija të kuqe për partitë politike.

“Nuk e kemi ndërmend me ba koalicion parazgjedhor me ndonjë parti politike dhe as nuk kemi në mënyrë kategorike mohimin e askujt. Këto vijat e kuqe që përdoren në vendet ballkanike për partitë poltike janë gënjeshtra të liderve politikë“ ka thënë Zeka për gazetën Blic.

I pyetur nëse do të bënte koalicion me Lëvizjen Vetëvendosjen, Zeka ka thënë se do t’i bashkonte forcat me cilën do parti që e mbështet programin e PEK-së, por vetëm pas zgjedhjeve.“Ne jemi të gatshëm pas përfundimit të zgjedhjeve me u fut në krijimin e qeverisë së Kosovës me cilado parti politike që mbështesin pjesërisht programin tonë” ka deklaruar Zeka.

Ndërkaq duke komentuar koalicionin e mundshëm parazgjedhor mes LDK-së dhe VV-së, ka thënë se janë parti pa parime.

“Vetë fakti që Lëvizja Vetevendosje në mënyrën më brutale ka fy e ka nënçmu dhe sulmu fizikisht liderin e Lidhjes Demokratike të Kosovës dhe sot ata shkojnë drejt një koalicioni të mundshëm me LDK flet që ata nuk kanë parime dhe principe”, u shpreh ai.

Ndryshe deputeti Milaim Zeka pas largimit nga Nisma Social Demokrate krijoi partinë më të re në vend të quajtur Partia Euroatlantike me 29 Qershor të këtij viti.