Lëvizja Vetëvendosje ka paralajmëruar se do t’i drejtohet Gjykatës Kushtetuese për emërimin e Kreshnik Gashit dhe Burim Ramadani në krye të Agjencisë Kosovare të Inteligjencës (AKI).

Sipas VV-së, emërimi i Gashit dhe Ramadanit nga kryeministri në largim, Ramush Haradinaj është antikushtetues.

“Sot u njoftuam nga mediet për pazarin e ri të Thaçit e Haradinajt në kurriz të shtetit. Sa më shumë afrohet dita e largimit të PAN-it nga pushteti, aq më shumë po dalin në pah fijet që i mbajnë lidhur. Thaçi e mori drejtorin e AKI-së e Haradinaj e mori kryeinspektorin”, thuhet në reagimin e VV-së.

Propozimi nga Haradinaj dhe dekretimi nga Thaçi për të dy këto pozicione, sipas këtij subjekti politik, i cili doli i pari në zgjedhjet e gjashtë tetorit,  është përveç të tjerave dhe antikushtetues. Në dy drejtime, sepse ish-kryeministri s’mund ta ushtrojë këtë kompetencë e Presidenti s’mund të dekretojë propozime nga një ish-kryeministër.

“Propozimet janë po ashtu emërime politike. I pari, ish-vartës i Hashim Thaçit në MPJ, u emërua si drejtor i AKI-së pasi që dështoi t’i mbrojë numrat e Z-mobile nga pozitat e drejtorit të bordit të ARKEP-it. I dyti u emërua kryeinspektor pasi dështoi të bëhej deputet i AAK-së, i cili mbahet mend për ankesat e tij rreth vjedhjes së votave që iu bënë nga brenda subjektit të tij. Duket se ky emërim ishte dhe rehatimi i tij”, thuhet në reagim.

VV, shton se me t’u konstituuar institucionet ky vendim antikushtetues do të adresohet për këtë shkelje të rëndë e paprecedent./arbresh.info

Ditët e abuzimeve të PAN-it kanë mbaruar, po ashtu edhe mundësitë e tyre për ta rrënuar më tej rendin kushtetues./arbresh.info