Është mbajtur mbledhja me qendrat e Lëvizjes Vetëvendosje ku i pranishëm ishte edhe kryeministri i vendit, Albin Kurti.

Me anë të një postimi në Facebook, LVV bënë të ditur se në fillim të mbledhjes u kujtua nata e 3 dhe 4 shkurtit 2000 masakrës dhe dëbimit të shqiptarëve nga pjesa veriore e Republikës së Kosovës, përcjell Arbresh.info.

“Megjithëse ende mungon vendosja e drejtësisë për këtë krim të kryer ndaj popullatës civile shqiptare, qeverisja e re po vazhdon të bëjë punë për kthimin e ligjshmërisë dhe kthimin e shqiptarëve nëpër tokat dhe shtëpitë e tyre në atë pjesë. Dy organizatat kriminale “Mbrojtja Civile” dhe “Brigada e Veriut” janë shpallë organizata terroriste, mbi 7 stacione të reja policore janë ndërtuar, dhe po vazhdojmë të ndajmë mjete financiare për ndërtimin e shtëpive në veri”, thuhet në njoftim.

Tutje thuhet se në mbledhje u diskutua mbi situatën politike në vend, për të vazhduar pastaj me situata të tjera.

“Në këtë mbledhje ku i pranishëm ishte Kryetari i Lëvizjes, njëherazi Kryeministri, Albin Kurti, Sekretari Organizativ, Alim Rama, Kryetarja e GVV-së, njëherazi ministrja e Drejtësisë, Albulena Haxhiu, Koordinatori i RVV-së, Libron Kelmendi, Koordinatori për Qendra, Valon Hoti dhe përfaqësues të Qendrave të Lëvizjes VETËVENDOSJE!, siç është zakon, puna filloi me një diskutim mbi situatën politike në vend për të vazhduar për situatën nëpër qendra, qytete, dhe çështje tona organizative”, njofton LVV.

“Në vijën e përgjithshme të zhvillimeve politike u theksua fillimi i mbarë i këtij viti me përplotë zhvillime të rëndësishme për Republikën tonë si: Liberalizimi i vizave, njohja e pasaportës së RKS-së nga Spanja, heqja e vizave nga Emiratet e Bashkuara Arabe, heqja e vizave nga Izraeli, Lëvizja e lirë me targa RKS pa stikera, blerja e raketave “Javelin” nga ShBA-ja, rikthimi i FSK-së në Defender Europe 2025, subvencionimi i faturave të energjisë elektrike për mbi 40 mijë familje të cenueshme, faturimi i energjisë elektrike në veri, shërbimet e ARBK-së për herë të parë në veri, heqja e dinarit të Serbisë, mbyllja e komunave paralele dhe arritje të tjera. Edhe muaji shkurt ka filluar mbarë dhe mirë me platformën e punësimit për të rinj SUPERPUNA ku tashmë e kemi zgjeruar nga mosha 18-25 vjeç në 18 – 29 vjeç”, thuhet tutje në njoftim.

“Te çështjet organizative u fol për anëtarësimet e reja dhe punën që po bëjnë qendrat tona në burime njerëzore në përgatitjen e tyre për zgjedhjet lokale. Lëvizja VETËVENDOSJE! ashtu siç është alternativa e vetme në nivelin qendror duhet të jetë dhe të shihet si alternative e vetme e drejtë dhe zhvillimore edhe në nivelin lokal dhe për këtë duhet t’ju përvishemi edhe më shumë punëve në ditë dhe javët në vijim, u tha në këtë mbledhje”, thuhet në fund të komunikatës për media./Arbresh.info