Policia e Kosovës ka thënë se rastet e dhunës në familje kanë qenë dhe vazhdojnë të mbeten shqetësuese, edhe përkundër faktit se rastet e tilla në vitin e fundit kanë shënuar rënie nga 2.757 raste në 2.460 raste, ose rënie prej 10.77% krahasuar me vitin paraprak, raste këto të cilat në këtë fillim vit vazhdojnë të mbeten edhe më tej shqetësuese.

Përmes një komunikate për media thuhet se Policia e Kosovës, bazuar në autorizimet e saja ligjore përmes planeve zhvillimore strategjike dhe planeve operacionale në vazhdimësi ka ndërmarr veprime në parandalimin e veprimtarive të ndryshme kriminale, përfshirë edhe ndërmarrjen e masave konkrete në sensibilizim dhe parandalim të rasteve të dhunës në familje, përcjell Arbresh.info.

“Ç’do herë kur flitet e raportohet për dhunën në familje, natyrisht se shfaqen parasysh shumë sfida, me të cilat përballen sot mjaft familje, jo vetëm në Kosovë, por kudo në botë, pasi dhuna në familje shkatërron jetët e njerëzve, sikurse ndodhen edhe dy rastet e fundit ai i vrasjes së rëndë në Ferizaj me datën 12.04.2024 dhe rasti i ndodhur sot 16.04.2024 në Pejë. Në të dy rastet Policia e Kosovës ka ndërmarr veprime konkrete duke arrestuar personat e dyshuar dhe të njëjtit i ka dërguar para organeve kompetente të drejtësisë”, thuhet në komunikatë.
Tutje në kumtesë thuhet se veprimet ligjore të Policisë së Kosovës janë ndërmarr dhe sipas tyre në të gjitha rastet përsonat e dyshuar janë arrestuar sic janë dy rastet e fundit në Ferizaj dhe Pejë.

“Veprimet ligjore të cilat bien në kompetencë të Policisë së Kosovës janë ndërmarrë ç’do herë, duke përfshirë edhe bashkëpunimin dhe koordinim me institucionet relevante siç janë, qendrat për pune sociale, mbrojtësit e viktimave dhe organet e drejtësisë. Në të gjitha rastet janë arrestuar personat e dyshuar dhe rastet janë trajtuar sipas udhëzimeve të organeve të drejtësisë, ashtu siç ka ndodhur edhe me arrestimin e dy personave të dyshuar të cilët dyshohen se kanë kryer vrasjet në Ferizaj dhe Pejë’, thuhet në njoftim.

Sipas policisë, një faktor shumë i rëndësishëm në parandalimin e dhunës në familje, është komuniteti, përfshirë këtu individët, organizatat dhe institucionet e ndryshme dhe sistemi ligjor duhet të jenë të bashkuar në përpjekjet për të siguruar dhënien fund çdo dhune në familje apo me bazë gjinore, duke përfshirë dhunën dhe abuzimin ndaj grave e fëmijëve.

“Përdorimi i dhunës nuk është forme e zgjidhjes së problemeve, vdekja e një personi në çfarëdo rrethane është tragjedi për familjen dhe komunitetin, andaj Policia e Kosovës vazhdon tu bëjë thirrje të gjithë njerëzve që të bashkëpunojnë me Policinë e Kosovës, ti raportojnë rastet pa vonesë, pasi kjo është mënyra e duhur për ti zgjidhur dhe parandaluar rastet si dhe për ti sjellë të dyshuarit para organeve të drejtësisë, për ta marrë dënimin e merituar nga institucionet kompetente”, thuhet në fund të komunikatës./Arbresh.info