Prokuroria Themelore në Prishtinë ka ngritur aktakuzë ndaj 14 zyrtarëve policorë, nën dyshimin për kryerjen e veprave penale, “Shkaktim i rrezikut të përgjithshëm”, “Përdorim i armës”, si dhe  “Moslajmërim i veprave penale”.

Zyrtarët policorë, dyshohet se këto vepra penale i kanë kryer më 18 shkurt të vitit 2022, kur kishin organizuar një ndejë private në fshatin Zllatar të Prishtinës, ku si pasojë e gjuajtjes me armë zjarri, ishte qëlluar për vdekje aksidentalisht, kolegu i tyre Lirim Haxholli, raporton Arbresh.info.

“Prokuroria Themelore në Prishtinë, njofton opinionin publik se Prokurori i Shtetit, pas zhvillimit të hetimeve, mbledhjes dhe analizimit të provave, ka ngritur aktakuzë ndaj katërmbëdhjetë zyrtarëve policor, të përfshirë në rastin e dt.18.02.2022, në fshatin Zllatar të Prishtinës”, thuhet në njoftim.

Sipas aktakuzës, të pandehurit F.A., E.I., B.M., E.Th. dhe G.T., më 18.02.2022, rreth orës 22:00, në fshatin Zllatar të Prishtinës, në një villë në këtë fshat, në të cilën kishin organizuar një aheng privat, jashtë detyrës zyrtare, kanë vepruar në kundërshtim me rregullat për autorizimet e policisë dhe përdorimin e armës të parapara në Ligjin për Policinë, në atë mënyrë që në zhvillim e sipër të ahengut, kanë shtënë me armë zyrtare duke përdorur municion jozyrtar, gjersa ishin në tarracën e villës ku zhvillohej ahengu. Me këtë, secili prej tyre individualisht e kanë kryer veprën penale “Përdorimi i armës apo mjetit të rrezikshëm”, nga neni 367 paragrafi 1 të KPRK-së, në lidhje me nenin 11 paragrafi 5 dhe nenin 27 paragrafi 1 të Ligjit nr. 04/L-076 për Policinë, në fuqi në Republikën e Kosovës.

“Të pandehurit F.A., E.I., B.M., E.Th. dhe G.T., në datën, vendin dhe kohën e lartcekur, si dhe për arsye të njëjta gjatë përdorimit të armës në kundërshtim me ligjin, kanë shkaktuar rrezik të madh për jetën e personave të pranishëm, andaj  me këtë kanë kryer veprën penale “Shkaktimi i rrezikut të përgjithshëm”, nga neni 356 paragrafi 1 të KPRK-së”, bënë të ditur prokuroria.

Ndërsa, të pandehurit A.B., Xh.B., A.M., A.A., A.Z., I.S., Rr.A., V.Rr. dhe A.M., sipas prokurorisë, nuk i kanë lajmëruar veprat penale të lartcekura, në atë mënyrë që nuk i kanë raportuar të shtënat me armë zjarri të bëra nga kolegët e tyre-të pandehurit gjatë ahengut ku kanë qëndruar së bashku, andaj me këtë kanë kryer veprën penale “Moslajmërimi i veprave penale apo kryerësve të tyre”, nga neni 378 paragrafi 1, nënparagrafi 1.9 të KPRK-së.

Prokurori i Shtetit me rastin e ngritjes së aktakuzës i ka propozuar gjykatës që të pandehurit të shpallen fajtorë dhe të dënohen sipas ligjit për veprat penale të cilat iu vihen në barrë.

Ndryshe, më 18 shkurt 2022 në Zllatar të Prishtinës, 15 zyrtarë policorë, përfshirë edhe tashmë të ndjerin Lirim Haxholli kishin organizuar një ndejë në një restorant në këtë fshat dhe rreth orës 23:50 të kësaj date dyshohet se është qëlluar aksidentalisht me armë zyrtare Lirim Haxholli.

Ndërkohë për vrasjen e Haxhollit tashmë po përballet me drejtësinë zyrtari policor, Fatlum Mehmeti.

Sipas aktakuzës të ngritur nga Prokuroria Themelore në Prishtinë më 20 tetor 2022, Fatlum Mehmeti akuzohet se më 18 shkurt 2022, rreth orës 13:45, në sallonin e vilës në fshatin Zllatar të Komunës së Prishtinës, me dashje eventuale ka privuar nga jeta tani të ndjerin, pjesëtarin e Policisë së Kosovës, Lirim Haxholli./Arbresh.info/