Pak minuta pasi janë bërë publike rezultatet e ekspertizës së Institutit të Mjekësisë Ligjore në Lozanë të Zvicrës për rastin e Astrit Deharit ka reaguar Lëvizja Vetëvendosje anëtarë i së cilës ishte Dehari.

Në reagimin e VV-së thuhet se Dehari është vrarë për shkak se ka qenë aktivist i Lëvizjes VETËVENDOSJE, shkruan arbresh.info.

Gjithashtu aty kërkohet që të nisin hetimet dhe kryesit e vrasjes të vihen para drejtësisë.

“Astrit Dehari është vrarë për shkak se ka qenë aktivist i Lëvizjes VETËVENDOSJE!

Këtë e ka thënë edhe raporti i ekspertëve të mjekësisë ligjore nga Shqipëria e Mbretëria e Bashkuar, këtë e thotë tani edhe raporti i ekspertëve të Qendrës Universitare Romande për Mjekësi Ligjore (CURML) në Lozanë të Zvicrës, këtë e ka thënë vetë trupi i Astrit Deharit.

Prokuroria e ka obligim ligjor dhe njerëzor që t’i fillojë hetimet për rastin, në mënyrë që përgjegjësit e këtij krimi monstruoz, që e privoi aktivistin 26 vjeçar Astrit Deharin nga jeta, të vihen të gjithë para drejtësisë. Drejtësia nuk duhet të ndalet para fajtorëve, sado lart që mund të ndodhen ata në hierarkinë e pushtetit. Po ashtu, duhen hetuar edhe ata që përkundër dhimbjes së familjes, shokëve dhe mbarë opinionit publik, u bënë mjet i dezinformimit menjëherë pas vrasjes së Astritit në burg. Cili ishte qëllimi i atyre që me çdo mjet, edhe duke gënjyer e duke i ndërruar fjalët, donin ta mbulonin krimin si vetëvrasje?

Znj. Xhemile Dehari, znj. Arta Boshtraj Dehari dhe z. Avni Dehari së bashku me avokatin z. Tomë Gashi kërkojnë që hetimet të fillojnë sa më parë. Ata falënderuan të gjithë ata që ndihmuan për informim të drejtë mbi rastin, dhe ata që mbajtën besimin e drejtë se kjo është vrasje tërësisht politike.

Lëvizja VETËVENDOSJE! poashtu kërkon që hetimet të fillojnë sa më parë, të pavarura, të drejta dhe profesionale. Qytetarët e Republikës së Kosovës, e gjithë shoqëria dhe shqiptarët kudo që ndodhen nuk janë të qetë deri sa të vihet drejtësia për Astritin”, thuhet në reagimin e VV-së.

Ndryshe sot Prokuroria Themelore në Prizren raportin e ekspertizë në gjuhën frënge dhe në gjuhën shqipe u ka dorëzuar familjes Dehari dhe përfaqësuesit të tyre ligjor.

Lexo edhe: Raporti i Zvicrës: Intervenimi i një personi të tretë në proces fatal duhet të kihet parasysh