Zarife Imeri, 23-vjeçarja nga Drenasi ka vdekur sot, dy ditë pasi që ishte imunizuar me vaksinën Pfizer.

Njëri nga familjarët e saj, Haxhi Xhemajli i cili ka reaguar me anë të një postimi në ‘Facebook’ duke thënë se vaksina është shkaktari i vdekjes së mbesës së saj, ka dhënë edhe detajet.

“Dje gjatë ditës ka pasur humbje të vetëdijes edhe e kanë dërgu në QKUK, pasi i ka marrë trajtimet mjekësore i kanë dhënë edhe disa doza të gjakut. Dyshimet e mia dhe të familjarëve që ka ardhur deri të vdekja për shkak të vaksinës kanë qenë se pasi i kemi pa dokumentet. Ishin shumë të paqartë dhe ne nuk i përkasim mjekësisë, nuk i kishim disa gjëra të qarta, por aty e shihnim se vdekja ka qenë e natyrshme pra kjo thuhej në raportin e mjekut. Derisa burimet e vëllait të Zarifes i kanë thënë se ka pasur gjakderdhje të brendshme dhe na dyshimet i kemi pas që edhe i kanë dhënë gjak edhe ka pas gjakderdhje dhe vaksinën e ka marrë para 48 orëve, shkaktari është vaksina sepse ajo ka qenë në gjendje të mirë përveç në 2017 që ka pas një intervenim”, tha Xhemajli për ATV.

Ai gjithashtu tha se do të kërkojnë super ekspertizë ligjore lidhur me këtë rast.

“Shpresojmë që Instituti i Mjekësisë Ligjore të bëjë një raport të pa anshëm por pavarësisht kësaj ne do të kontaktojmë me prokurorin dhe do të kërkojmë një super ekspetizë lidhur me këtë rast”, shtoi ai.

Klinika Emergjente e Qendrës Klinike Universitare e Kosovës, sot përmes një komunikate për media ka dhënë sqarime rreth vdekjes së 23 vjeçares në Drenas, për të cilën familjarët kanë pohuar se ajo ka ndërruar jetë tri ditë pasi ka marrë vaksinën kundër COVID-19.

Ndërsa Departamenti i Krimeve të Rënda, në Prokurorinë Themelore të Prishtinës ka njoftuar se është duke trajtuar rastin e 23-vjeçares nga Drenasi e cila ka vdekur dje në Qendrën Klinike Universitare të Kosovës, e që familjarët e saj kanë deklaruar se ajo ka vdekur tri ditë pasi është vaksinuar kundër COVID-19.