Kryetarja e KQZ-së, Valdete Daka, ka thënë se telefonimi i mërgimtarëve nuk është i vetmi veprim që do të bëjnë ndaj tyre për t’ia mundësuar votimin në zgjedhjet e 14 shkurtit.

Ajo tha se kjo është një nga procedurat dhe se përmes kësaj synohet verifikimi i votuesit, i cili më herët do të ketë plotësuar një aplikacion me të dhëna dhe se telefonata nuk do të bëhet vetëm një herë në rast të mospërgjigjes, njofton Klan Kosova.

“Ky vendim s’e privon mërgatën të votojë, por vetëm e bën verifikimin e votuesve. Është bërë një fushatë kundër KQZ-së dhe kundër vendimit, i cili e bën më të qartë integritetin e votës së diasporës. KQZ s’ka tentuar dhe as do të tentojë ta privojë diasporën të votojë, por në çdo palë zgjedhje ka ndërmarrë gjithçka që është e mundur ligjërisht për t’ia mundësuar votimin edhe atyre”.

Daka në Rubikon gjithashtu tha se duhet marrë parasysh se thuajse përherë zgjedhjet kanë qenë të jashtëzakonshme, prandaj edhe koha e përgatitjes është e shkurtër për një operacion të komplikuar të votimit për diasporën.

Si do të zhvillohet procedura e telefonatave?

“Kjo çështja e telefonatave është banalizuar. S’është e vërtetë që KQZ do t’ia pamundësojë votimin mërgimtarëve vetëm për faktin se nuk është lajmëruar në telefon. Ne kemi zhvilluar hap pas hapi procedurën dhe s’është i vërtetë që verifikimi bëhet vetëm me telefon. Aplikacionet e votuesve jashtë Kosovës plotësohet nga dokumentet që bashkëngjiten dhe nëse i plotësojnë kushtet atëherë vetëm në fund KQZ do t’i telefonojë. Në ditën e zgjedhjeve në Kosovë çdo qytetar duhet ta tregojë një dokument identifikimi dhe i njëjti send do të jetë edhe për qytetarët jashtë vendit. Në një mënyre do të na duhet ta verifikojmë. Telefonata do të bëhet disa herë ndaj një personi për të verifikuar nëse është ai që ka aplikuar”.

Ajo u ankua se në rrjetet sociale, përveç shakave, pati edhe ofendime ndaj KQZ-së e deri në personale.

“Tashmë në rrjete sociale jemi bërë temë e hajgarave të mëdha, sharjeve, fyerjeve deri në fyerje personale që kanë qenë të drejtuara në radhë të parë ndaj meje si kryetare e KQZ-së. Unë e kam ndje veten shumë të ofenduar dhe s’është Valdete Daka ajo e cila e ka marrë këtë vendim. Mos harroni që ne dje kemi votuar të gjithë unanimisht. Të gjithë anëtarët që kanë qenë prezent e kanë votuar pa asnjë reagim, pa fjalë që më kishin bërë me dije që kanë diçka kundër këtij vendimi. Këtë vendim e kam lexuar me zë dhe e kemi marrë në prani të gazetarëve”.