Mospjesëmarrja e serbëve në votimet për largimin ose jo të kryetarëve në komunat veriore, mund të reflektohet në dialogun Kosovë – Serbi. Qëllimi ishte që Kosova të shihet si e paaftë në menaxhimin e situatës në veri, thonë njohës të çështjeve politike në vend.Kurse, Rada Trajkoviq, këshilltare e ministrit të komuniteteve në Qeverinë e Kosovës, thotë se bojkoti nuk është i mirë për serbët që jeton atje.

Organizimi i procesit të votimit në komunat veriore, në pamje të parë duket pozitiv për Kosovën. Por, mos dalja e serbëve në votime u bë qëllimshëm, thotë profesori universitar, Dritëro Arifi. Sipas tij, qëllimi është që në dialogun Kosovë- Serbi që zhvillohet me ndërmjetësimin e BE-së, Kosova të dalë e paaftë për menaxhimin e situatës, në veri.

“Ne, gjithsesi, do të duhej të gjenim një zgjidhje Nëse jo tash, ndoshta vitin e ardhshëm. Por mospjesëmarrja e serbëve në veri ishte e qëllimshme, në një të ardhme të afërt apo të largët që të shihet Kosova si e paaftë për të menaxhuar situatën në veri dhe në njëfarë mënyrë në dialog të ketë më shumë përparësi Serbia dhe serbët e veriut”, tha Arifi.

Ai thotë se varet nga zhdërvjelltësia diplomatike se si Kosova do të arrijë ta argumentojë situatën.

Kurse, Rada Trajkoviq, këshilltare e ministrit të komuniteteve në Qeverinë e Kosovës dhe kryetare e Lëvizjes Evropiane të Serbëve nga Kosova, thotë për Radio Kosovën se bojkoti për zëvendësimin e kryetarëve të komunave në katër komuna në veri të Kosovës nuk është i mirë për popullatën serbe që jeton atje.

“Mendoj që bojkoti i serbëve për këtë proces dëmton vetë serbët, ndërsa populli si popull më nuk është duke kuptuar asgjë. Serbët më as nuk kanë vizion e as liderë të tyre që mund t’ua ofrojë një vizion. Ata vetëm janë duke i zbatuar urdhrat për të mbijetuar sot për nesër. Lista Serbe është duke e përdorur pozitën në të cilën ndodhet populli serb, e cila tani si asnjëherë më parë tërë ekzistencën e saj e ka lidhur me politikën në Beograd, duke dalë nga të gjitha institucionet në veri të Kosovës, dhe e tërë ekzistenca e tyre financiare tani varet drejtpërdrejt nga Beogradi”, konsideron Trajkoviq

Ajo fajëson presidentin serb, Aleksandar Vuçiq dhe lidershipin politik në Beograd për situatën e krijuar në veri të vendit.

Ndërkaq, analisti Artan Muhaxhiri thotë se kjo situatë do të zgjasë edhe disa muaj dhe se do të vonojë në zgjidhjen e problemeve të tjera. Qeveria ka vlerësuar se Kosova me organizimin e procesit të votimit për shkarkimin e kryetarëve në veri i ka përmbushur obligimet e saj dhe ka kërkuar nga Bashkimi Evropian që t’i heqë masat e vendosura kundrejt Kosovës.