Pas pauzës 20 muajshe, u takuan sy më sy kryeministri i Kosovës, Avdullah Hoti e presidenti i Serbisë, Aleksandar Vuçiq.

E pas takimit të djeshëm (16 korrik) në Bruksel, është vendosur që Hoti dhe Vuçiq të takohen sërish në fillim të muajit shtator.

Kështu bëri të ditur në një deklaratë i emëruari i posaçëm i BE-së për dialogun Kosovë – Serbi, Miroslav Lajçak, shkruan portali arbresh.info.

Se në Bruksel u diskutua për të pagjeturit, të zhvendosurit dhe ekonomitë e dy vendeve, u tha nga të dyja palët pas takimit.

“Diskutimet u fokusuan në dy elemente. E para ishte personat e zhdukur dhe të zhvendosur, për pjesën e parë është një çështje simbolike në kontekstin e pajtimit dhe është një çështje për familjet që po jetojnë me paqartësi. Është kyçe të punohet me Kryqin e Kuq për të zgjidhur rastet e mbetura dhe t’i jepet një mbyllje çështjes. Për temën e dytë është një çështje gjithashtu e rëndësishme, është për sigurimin e kushteve të jetesës për ata që janë kthyer. E dyta ishte edhe bashkëpunimi ekonomike. Bashkëpunimi i intensifikuar ekonomik do të thotë vënia në përdorim e tërë potencialit ekonomik të Kosovës dhe Serbisë, dhe do të thotë krijimi i vendeve të punës dhe përmirësimi i jetës për njerëzit. Të dy liderët janë pajtuar të vazhdojnë të punojnë në nivele ekspertësh këtu në Bruksel. Takimi i radhë do të mbahet në fillim të muajit shtator”, deklaroi Lajçak.

Kryeministri i Kosovës, Avdullah Hoti tha se njohja  reciproke dhe normalizimi i raporteve në mes të dy vendeve janë parimet bazë dhe qëllimi përfundimtar i këtij procesi.

“Me kërkesën tonë, dy temat e takimit të parë ishin personat e pagjetur dhe çështjet ekonomike. Për ne tek ekonomia përfshihen edhe kompensimi i dëmeve të luftës, suksesioni, borxhi shtetërorë, pensionet, kursimet në banka, pagat e humbura të punëtorëve të larguara nga puna, dëmtimet e pronës private dhe çështje të tjera që do të vazhdojnë të diskutohen në takimet e ardhshme. Jemi të vendosur që çështja e të pagjeturve të mbyllet sa më shpejt, sepse ndjejmë obligim moral ndaj familjeve të tyre”, tha Hoti pas takimit.

E presidenti serb, Aleksandar Vuçiq tha se në takimin e djeshëm kanë mbrojtur e përfaqësuar interesat serbe, kurse bëri të ditur se në shtator do të diskutohen cështje të tjera, si pronat, por që ai ka kërkuar të bisedohet edhe për Asociacionin./arbresh.info/