Ministri i Punëve të Brendshme të Kosovës, Xhelal Sveçla ka reaguar pas protestës së sotme nga Njësiti Special Intervenues (NJSI) dhe Sindikata e Policisë së Kosovës para Qeverisë.

Ai tha se me marrjen e mandatit, Policia e Kosovës, Njësitë Speciale kanë pasur dhe vazhdojnë të kenë mbështetjen më të madhe si në aspektin financiar ashtu edhe me ngritjen në strukturë.

Ministri shkruan se gjatë kësaj kohe së bashku kemi bërë shumë punë të mira në drejtim të luftimit të krimit, korrupsionit e kontrabandës, pavarësisht se nga gjyqësori s’është se jemi ndihmuar shumë. Veçanërisht kemi shtrirë integritetin, sovranitetin dhe sigurinë në veri të vendit, shkruan Arbresh.info

Dhe shton se nuk beson që ka pagë që do të na nxiste ta bënim këtë, por kemi bërë maksimumin që përbrenda mundësive tona të trajtojmë secilin njësit të Policisë së Kosovës ashtu siç e meriton.

Postimi i plotë:

Republika e Kosovës ka ekonominë dhe buxhetin me të cilin adreson nevojat e shtetit dhe shoqërisë.

Me to, me gjithë arritjet e viteve të fundit duhet të mbulohen e trajtohet gjithçka dhe çdokush.

Ndërkohë që ka shumë kategori shoqërore që edhe brenda tyre, por edhe krahasuar njëra me tjetrën, më parë janë trajtuar në mënyrë jo të barabartë.

E gjithë përpjekja jonë është që me mundësitë që kemi të ulim pabarazinë edhe brenda profesionit edhe mes profesioneve të ndryshme.

Në qasjen tonë, paga asnjëherë nuk ka qenë e shkëputur nga kushtet e tjera të punës që përbëjnë një aspekt esencial të trajtimit të punëtorëve të secilit sektor, ndër këta sigurisht edhe Policia e Kosovës.

Ritheksoj se për Policinë e Kosovës nga marrja e mandatit tonë deri sot e kemi rritur buxhetin për 30%, ndërkaq në investime kapitale rritja është prej 300%.
Buxheti për pajisje operacionale ka qenë më pak se gjysmë milioni, ndërkaq sot është mbi 9 milionë euro apo 21-fish më shumë.
Bashkë me Ministrinë e Shëndetësisë dhe ShSKUK-në kemi nënshkruar marrëveshjen e bashkëpunimit përmes së cilës të gjitha shërbimet shëndetësore në të gjitha rajonet e Kosovës, do të ofrohen për zyrtarët policorë me prioritet dhe pa asnjë pagesë.
Me marrjen e mandatit nga ne Policia e Kosovës, Njësitë Speciale kanë pasur dhe vazhdojnë të kenë mbështetjen më të madhe si në aspektin financiar ashtu edhe me ngritjen në strukturë.
Si Ministri e Punëve të Brendshme për detyrë e kemi të mendojmë e përkujdesemi për tërësinë dhe kështu duke u lëshuar në secilën prej 9 agjencive ekzekutive e pastaj trajtim specifik për njësitë përbrenda secilës agjenci veç e veç, gjithnjë duke pasur parasysh mundësitë reale dhe qasjen e drejtë.

Sakrifica asnjëherë nuk mund të jetë pikënisje për të përkufizuar një shpërblim sepse kjo formë përveçse e dëmshme del të jetë gjithnjë e pamundur.

Asnjë sakrificë të popullit shqiptar në histori, të asnjë individi nuk do të mund ta shpërblejmë për ta barazvlerësuar sepse jeta është e paçmueshme. Ajo nuk ka çmim. Asnjë çmim, asnjë shpërblim nuk do të jetë i barazvlefshëm, asnjëherë, me jetën porse ky është angazhimi ynë për vendin.

Gjatë kësaj kohe së bashku kemi bërë shumë punë të mira në drejtim të luftimit të krimit, korrupsionit e kontrabandës, pavarësisht se nga gjyqësori s’është se jemi ndihmuar shumë. Veçanërisht kemi shtrirë integritetin, sovranitetin dhe sigurinë në veri të vendit.

Nuk besoj që ka pagë që do të na nxiste ta bënim këtë, por kemi bërë maksimumin që përbrenda mundësive tona të trajtojmë secilin njësit të Policisë së Kosovës ashtu siç e meriton.

Kam qenë shumë i vetëdijshëm për gjendjen në të cilën do ta gjejmë sigurinë në Republikën e Kosovës dhe gjendjen e mjerueshme në aspektin infrastrukturoro-financiar Policinë e Kosovës, por me shumë punë e angazhim, pavarësisht secilës sfidë, kemi bërë punë të mira e do të vazhdojmë të bëjmë.

Të gjithë së bashku kemi shtruar një rrugë të drejtë e të sigurtë të ndryshimit të gjendjes së sigurisë në vend dhe kjo rrugë nuk ka më kthim mbrapa.

Kushdo që në çfarëdo forme, për interesa personale apo grupore tenton të përdorë situata të ndryshme me qëllim të zbehjes së këtyre angazhimeve është i predispozuar që të dështojë.

Ne nuk do të ndalemi. Sepse ne jemi në rrugën e duhur dhe të drejtë

Imer Zeqiri nga Sindikata e Policisë së Kosovës në protestën së bashku me pjesëtarët e Njësisë Speciale Intervenuese (NjSI) ka thënë se po kërkojnë nga qeveria që të plotësojë kërkesat legjitime dhe ligjore të policisë në një afat kohor sa më optimal.

Kjo pasi sipas tij kërkesat e policisë janë me prioritet dhe si të tilla duhet edhe të trajtohen.

“Po kërkojmë nga qeveria që të plotësojë kërkesat legjitime dhe ligjore të policisë me qëllim të mirëqenies, kërkesat janë me prioritet dhe duam realizim në një afat kohor sa më optimal”, ka thënë Zeqiri.

Këto janë kërkesat e paraqitura nga Zeqiri:

“Përmirësimi i kushteve, veshmbathje, mjete të punës, objektet policore dhe pajisjet tjera,

Rrezikshmëria për policët të jetë permanente dhe të mos varet nga një vend, dhe shtesat të jenë 25 deri 50 përqind e pagës bazë dhe të formohet komisioni i cili do të bëjë kategorizimin e shtesave,

Përfshirje e njësive të caktuar në tregun e punës,

Ligji për pensionim në moshën 55 vjeçare,

Sigurimi jetësor dhe rritja në fondin shëndetësor,

Invaliditeti, policë të cilët janë lënduar gjatë kryerjes zyrtare,

Përfshirja e stafit civil në shtesat për punë specifike,

Shujta ditore për të gjithë pjesëtaret, jo në mënyrë selektive,

Pagesa e udhëtimit të atyre që udhëtojnë larg,

Shtesat për fundvit, për ata që kanë treguar performance të mirë gjatë vitit,

Rikthimi i përvojës së punës siç ka qenë, dhe njohja e shkollimit,

Të rikthehen tri paga përcjellëse për ata që pensionohen,

Të lejohet një pagë për policët që mund të kenë një rast vdekje në familje,

Përkujdesje për mirëqenien e pjesëtarëve të policëve, për ata që kanë rënë gjatë detyrës zyrtare”./Arbresh.info