Një person është arrestuar në Gjakovë pasi që i njëjti ka hedhur lëndë djegëse në disa vetura të Policisë të cilat kanë qenë të parkuara në parkingun e Njësisë Rajonale të Komunikacionit Rrugor në Gjakovë

Lajmin për Arbresh.info e ka konfirmuar zëdhënësi i policisë për rajonin e Gjakovës, Sheremet Elezaj i cili tha se dy vetura janë përfshirë nga zjarri i cili është lokalizuar shpejt.

Sipas tij, motivet ende janë të panjohura.

Rasti ka ndodhur sot rreth orës 17:50.

“Sot rreth orës 17:50, i dyshuari mashkull kosovar i moshës madhore është arrestuar pasi që i njëjti, për motive ende të panjohura, ka hudhur lëndë djegëse në disa vetura të Policisë të cilat kanë qenë të parkuara në parkingun e Njësisë Rajonale të Komunikacionit Rrugor në Gjakovë. Dy vetura janë përfshirë nga zjarri i cili është lokalizuar shumë shpejt.”, ka thënë Elezaj.

Lidhur me rastin është njoftuar prokurori  i shtetit me vendimin e të cilit është iniciuar rast “shkaktim i rrezikut të përgjithshëm”./Arbresh.info/