Gjyqtari i Gjykatës Themelore në Prizren, njëherësh edhe anëtar i Këshillit Gjyqësor të Kosovës(KGJK), Skender Çoçaj është zgjedhur kryesues i KGJK-së.

Me shumicën e thjeshtë të votave, Çoçaj të enjten  u emërua në krye të KGJK-së me mandat tre vjeçar.

Nga 11 vota gjithsej, Çoçaj mori 6 prej tyre, ndërsa me një votë më pak, kundër kandidati i tij, kryesuesi i deritashëm i këshillit, Nehat Idrizi  pritet të dorëzoj mandatin e tij.

Para se të niste  votimi  për zgjedhjen e të parit të KGJK-së,  dy kandidatët paraqitën vizionet e tyre për këtë këshill.

Kryesuesi i deritashëm ,  Nehat Idrizi pohoi se nëse do të vazhdoi edhe një mandat, do të punoj në pavarësimin e KGJK-së. Përveç kësaj, ai theksoi se do të ketë  ngritje të transparencës dhe llogaridhënies në këtë institucion.

“Zotohem në pavarësimin e këtij këshilli. Ngritja e performances, transparencës je llogaridhënies në KGJK si dhe avancimi i statusit të gjyqtarëve” është shprehur Idrizi.

Edhe  kryesuesi i sapo zgjedhur,  Skender Çoçaj paraqiti vizionin e tij.  Ai, pohoi se qëllimi kryesor i tij si kryesues  është transparenca, bashkëpunimi me media dhe Shoqërinë Civile.

Me ardhjen e tij në këtë pozitë, Çoçaj premtoi një gjyqësor të pavarur dhe efikas, si dhe  premtoi se do të angazhohet për të zvogëluar numrin e lëndëve në gjykata, duke i dhënë prioritet lëndëve të korrupsionit dhe krimit të organizuar.

Çoçaj ishte zgjedhur si anëtar i KGJK-së nga gjyqësori në qershor të vitit 2016. Ndryshe, kryesuesi  i deri tashëm, Nehat  Idrizi kishte ardhur në pozitën e kryesuesit të KGJK-së në shkurt të vitit 2016 me mandat tre vjeçar./Arbresh.info/