Pasaportat janë të nevojshme nëse dëshironi të udhëtoni jashtë vendit pasi ato verifikojnë identitetin dhe kombësinë tuaj. Ato i japin bartësit kalim të sigurt dhe mbrojtje në një tokë të huaj.

Ekzistojnë disa lloje të pasaportave në varësi të statusit të bartësit në vendin e tyre të lindjes.

Por, si qëndrojnë vendet e Ballkanit sa i përket peshës dhe fuqisë së pasaportave të tyre, sipas “Passport index”.

Më së keqi qëndron vendi i Kosovës, ku shteti ynë fatkeqësisht ende nuk e gëzon të drejtën e liberalizimit të vizave nga Bashkimi Evropian.

Sidoqoftë, Kosova gjendet në vendin e 70-të në botë sa i përket fuqisë së pasaportës.

Qytetarët tanë mund të udhëtojnë në 14 shtete të ndryshme pa viza dhe në 34 vende të tjera që iu jepen viza kosovarëve pasi të arrijnë apo ndryshe siç quhen “viza në mbërritje”.

Ndërsa në 154 shtete tjera kërkohet që të ketë një vizë për të hyrë në atë vend.

14 vendet që kosovarët mund të udhëtojnë pa viza janë: Shqipëria, Bregu i Fildishtë, Domenika, Ekuadori, Gambia, Haiti, Maqedonia e Veriut, Mikronezia, Mali i Zi, Territoret Palestineze, Serbia, Shri Lanka, Shën Vinsent-Grenadine dhe Turqia.

Kurse, këto janë gjithashtu 34 vendet që kosovarët kanë të drejtë të udhëtojnë por duhet të pajisen me vizë pasi të arrijnë: Bangladesh, Bolivi, Kamboxhia, Kepi i Gjelbër, Komoret, Kuba, Xhibuti, Etiopi, Gabon, Guinea-Bisau, Iran, Xhamajka, Jordani, Laos, Lesoto, Mako, Madagaskar, Maldive, Ishujt Marshall, Mauritania, Mozambik, Nepal, Oman, Palau, Katar, Raundë, Samoa, Sejçells, Somali, Tanzani, Timori Lindor, Togo, Tuvalu dhe Uganda.

Ndërsa, listës së pasaportës më të fortë Ballkan i prin Sllovenia dhe Greqia që aktualisht e ndajnë pozitën e njëjtë mes vete.

Këto dy shtete janë në vendin e gjashtë në botë dhe të parat në Ballkan.

Nëse ju keni njërën prej këtyre pasaportave, ju keni drejtë të vizitoni 95 vende të botës ku nuk kërkohet viza dhe 34 vende të tjera që viza kërkohet pas arritjes në destinacionin e preferuar, ndërsa në 69 shtete të tjera ju kërkohet të keni një vizë për të arritur aty ku dëshironi.

Pas këtyre, qëndron Kroacia që aktualisht është në vendin e dhjetë në botë dhe e treta në Ballkan në bazë të pasaportës që e posedon.

Aktualisht, shtetasit kroatë kanë të drejtë të lëvizin në 95 vende të ndryshme të botës pa viza, 34 vende tjera ku viza kërkohet pasi arrini në atë vend, ndërsa në 73 shtete të tjera kërkohet vizë për hyrje qoftë në kufi apo në aeroport.

Pak më dobët dhe pothuajse njëjtë qëndron Rumania, me vetëm një shtet më pak se Kroacia apo më saktë në 94 lokacione të botës që nuk kërkohet vizë gjatë vizitës prej shtetasve rumun, ndërsa ka një shtet më shumë sa i përket kërkesës për vizë.

Tutje vazhdon Bullgaria që gjendet në pozitën e 12-të si pasaporta më e fortë në botë, ku përmes saj keni drejtë të vizitoni 87 vende të ndryshme në glob.

Më keq se vendi i lartcekur qëndron Serbia, që gjendet në pozitën e 37-të në botë, ndërsa qytetarët e saj kanë të drejtë të vizitojnë 42 vende pa viza, ndërsa një gjë e tillë iu kërkohet në 121 vende të tjera.

Pothuajse njëjtë është edhe Bosnja e Hercegovina, që është në vendin e 39-të në botë, me të drejtë vizite pa ndonjë kërkesë në 40 vende, kurse, në 123 shtete të ndryshme kërkohet të ketë një vizë valide.

Tjetër shtet nga Ballkani që gëzon të drejtën për lirinë e lëvizjes është edhe Maqedonia e Veriut, që gjendet në vendin e 43-të në botë, ndërsa qytetarët e saj mund të vizitojnë 34 vende të ndryshme pa viza, por jo edhe në 129 shtete të tjera, ku kërkohet një gjë e tillë.

Pak më keq në renditje është Mali i Zi, me dy pozita më poshtë sa i përket fuqisë së pasaportës në rajonin e Ballkanit, por qytetarët e këtij shteti kanë të drejtë të vizitojnë 35 shtete pa viza, ndërsa në 129 vende të tjera kërkohet viza gjatë arritjes në destinacionin e tyre, shkruan Sinjali.

Ndërsa, pas Malit të Zi, një gjendje pothuajse të njëjtë e ka edhe Shqipëria, ku vendi shqiptar gëzon të drejtën për të dalë në 31 vende të ndryshme pa viza, ndërsa në 131 shtete të tjera, duhet të ketë një vizë pas apo para arritjes në vendin e dëshiruar.

Aktualisht, pasaporta më e fortë në botë është ajo e Gjermanisë, ku gjermanët kanë të drejtë të udhëtojnë në 100 vende të ndryshme të botës pa pasur nevojë për vizë.