Serbët e Kosovës duhet të flasin në mënyrë të bashkuar dhe të unifikuar, të mblidhen rreth Listës Serbe dhe të garojnë në zgjedhjet e parakohshme parlamentare në Kosovë.

Kështu është shprehur shefi i Zyrës për Kosovë në Qeverinë e Serbisë, Marko Gjuriq, derisa ka shtuar se Lista Serbe është një instrument i rëndësishëm për ushtrimin e të drejtave të serbëve në Kosovë, shkruan arbresh.info.

Ai ka theksuar se zgjedhjet janë një mundësi për serbët të sigurojnë një pozicion të vendosur në Kosovë.

“Për të parandaluar skenarin që shumë do të donin të shihnin në Prishtinë, që do të thotë që serbët të jenë në kolona të shumta, të ndahen. Sipas rregullave të tyre, mjafton që vetëm një deputet të jetë nga një grup që i dëbuan si serbë dhe pastaj emëroni në Qeveri dhe në të gjitha pozicionet e tjera jo njerëzit që do të bashkëpunojnë dhe veprojnë brenda politikës së shtetit të Serbisë dhe do të bashkëpunojnë me Beogradin, por që ata të jenë njerëzit që janë në funksion të Ramush Haradinaj, Hashim Thaçi dhe të gjithë të tjerët “, ka deklaruar Gjuriq për RTS.

Ai ka shtuar se këshillimet me Listën Serbe po vazhdojnë çdo ditë, dhe se ai do të marrë një vendim për pjesëmarrjen në zgjedhjet e parakohshme. Sipas tij, interesi i popullit serb është të mbetet unik.

“Ne po flasim vazhdimisht dhe si gjithmonë marrim vendimin për të votuar. Unë mendoj se serbët duhet të mblidhen fuqishëm rreth Listës Serbe”, ka vlerësuar ai.

Ai u thotë serbëve në Kosovë se Serbia është me ta.

“Tani për tani, unë dua t’u them të gjithë bashkëqytetarëve tanë në radhë të parë që shteti i tyre do të jetë me ta, që ne do të vazhdojmë t’i mbështesim materialisht, se do të vazhdojmë të investojmë”, ka thënë Gjuriq.

Ai shtoi se si pjesë e programit të Presidentit Vuçiq dhe Qeverisë, 347 projekte mbështetëse për serbët në Kosovë janë duke u implementuar./arbresh.info/