Lëvizja Vetëvendosje ka organizuar sot konferencë për media lidhur me çështjen e shqiptarëve në Preshevë, Medvegjë dhe Bujanoc.

Deputeti i kësaj partie, Rexhep Selimi, ka kritikuar ashpër faktorët qeveritarë si në Kosovë ashtu edhe në Shqipëri, pasi që sipas tij ata kanë manipuluar me çështjen e shqiptarëve atje.

E për bashkimin e shqiptarëve atje Selimi tha se deri më tani nuk ka pasur asgjë konkrete me shkrim, por vetëm me deklarata.

“Çështje e pazgjidhur dhe shpesh herë e manipuluar nga faktorët e ndryshëm qeveritarë, qoftë në Kosovë, qoftë në Shqipëri, mbetet gjendja e shqiptarëve ne Preshevë, Medvegjë dhe Bujanoc. Komunat Shqiptare janë në gjendje shumë të rëndë atje, ku kemi edhe zbrazjen e tyre, por në ndërkohë, Presidenti i Kosovës e ka përgatitur një rezolutë që do e sjell në Kuvend që ka të bëjë me shqiptarët Preshvë, Medvegjë, Bujanoc, por ne e dimë që ka rezoluta që janë votuar e nuk janë zbatuar.
Flitet për bashkimin e tyre por flitet në kuadër të një plani të shkëmbimit të territoreve, diçka që është e papranueshme dhe e rrezikshme. Deri më tani pavarësisht kontakteve me faktorët politik atje, e theksoj se asnjë marrëveshje e shkruar me ta nuk ekziston, është diçka e qëllimte. Asnjëherë s’kemi arritur ta kushtëzojmë çështjen e tyre në këto tre komuna. Kjo duhej të ndodhte në rrethana më të mira. Shqiptarët sërish mbeten nën presion dhe po vazhdon shpërngulja e njerëzve prej atje” tha Selimi  

Deputeti Selimi, tha se Bashkimi i Kosovës me këto tre komuna nuk duhet t’i kushtoj me ndarje shtetit Kosovës.

”Duhet të ndodhë bashkimi i Preshevës ,Medvegjës dhe Bujanocit, por me Kosovën e bashkuar. Bashkimi i tyre nuk duhej ta kishte çmimin e ndarjes së Kosovës” tha Selimi

Nder te tjera, ai ka thënë se nëse çështja e Shqiptarëve atje, nuk kushtëzohet para dialogut me Serbinë, s’ka se si dialogu të sjellë rezultate për ta./Arbresh.info