Ish-Ministri i Punëve të Brendshme, Flamur Sefaj, ka pranuar se ai nuk i ka informuar presidentin dhe kryeministrin lidhur me veprimet për deportimin e gjashtë shtetasve turq.

“Unë nuk e kam informuar as kryeministrin, as presidentin”.

Por, sipas tij, një gjë të tillë, sipas procedurave, do të duhej ta bënte shefi i Agjencisë Kosovare për Inteligjencë.

“Të gjitha këto institucione është dashur ta dinë, në bazë të Kushtetutës dhe Ligjit për AKI-në. Së paku, kryeministri dhe presidenti i shtetit është dashur të jenë të informuar”.

“Duke u nisur nga një supozim i logjikshëm, unë sot mund të them se kanë qenë të informuar në bazë të ligjit”.

“Në një shtet të organizuar mirë, ku anëtarët e koalicionit gjatë natës nuk merren me ‘prerje kokash’, sigurisht do të duhej të funksiononte kështu në institucione”.

“Fatkeqësisht, ne e kemi një sistem paralel, ku i kemi binarët dhe aty ngasim me shpejtësi më të madhe se në pjesën institucionale, prandaj ndodhin këto gjëra”.

Sefaj, që është i ftuar në Zona B të Klan Kosovës, ka thënë se deportimi i gjashtë shtetasve turq ka qenë iniciativë e AKI-së, prandaj ky institucion do të duhej të informonte presidentin dhe kryeministrin.

“Natyrisht, për të gjitha iniciativat që janë nisë nga Ministria e Punëve të Brendshme unë e kam informuar kryeministrin, sepse ai ishte eprori im dhe ai duhej të ishte i informuar. Mirëpo, jo për një veprim dhe iniciativë të një organi aq të rëndësishëm siç është AKI-ja”.

“Kjo ka ardhë si iniciativë dhe veprim i AKI-së dhe AKI-ja në bazë të ligjit të cilin e ka duhet ta informojë kryeministrin dhe presidentin për veprimet e AKI-së”.

“Po ashtu, duhet t’i informojë kryeministrin dhe presidentin për cenim të sigurisë shtetërore”.

“Janë dy pika për të cilat kanë qenë dashur të informohen ndaras – se kemi rrezik dhe pastaj se po e ndërmarrim këtë veprim”.

Ish-Ministri i Punëve të Brendshme ka konfirmuar se nuk i ka informuar krerët shtetërorë, por ka thënë se nuk mund të sigurojë nëse një gjë të tillë e ka bërë ose jo drejtori i AKI-së.

“Unë e di që unë nuk i kam informuar, atë po e konfirmoj. Nuk mund ta di se a i ka informuar drejtori i AKI-së, dhe ata ndoshta nuk e kanë marrë aq të rëndësishme”.

Sefaj duke komentuar deportimin e gjashtë shtetasve turq, ka thënë se në Ministrinë që ai e ka drejtuar kjo ka qenë vetëm një punë rutinore.

“Tash ne po i quajmë ‘gylenistë’, por në atë moment unë nuk kam pasë asnjë informatë se ata janë ‘gylenistë’”.

“Duke u bazuar në dokumente dhe informata, nuk ka asnjë etiketim ose kategorizim të tillë të personave”.

“Është punë rutinore. Zakonisht, kërkesat e tilla të mëhershme nuk kanë kaluar përmes Ministrit të Punëve të Brendshme. por kanë shkuar drejtpërdrejt te Drejtori i Departamentit për Shtetësi dhe Azil”.

“Kjo kërkesë ka ardhur tek unë. E kam lexuar, e kam shqyrtuar, i kam kryer të gjitha procedurat”.

“E kam informuar Drejtorin e Departamentit për Shtetësi dhe Azil, sepse ai pastaj duhej të merrej me të e jo unë, sepse unë nuk kam atë rol ekzekutiv në ato departamente”.

“I kemi përfunduar të gjitha procedurat, i është dorëzuar dhe kam kërkuar që të procedojnë në bazë të ligjit, sepse edhe mua më është prezantuar si procedurë mjaft rutinore”.

“Heqja e lejes së qëndrimit dhe pastaj largimi është një punë që bëhet shpesh nga Ministria e Punëve të Brendshme dhe nga organet tjera që kyçen aty”.