Ish-kreu i Skenderaj, Sami Lushtaku ka reaguar pas lajmeve për punësimin e nipit të tij në konsull në Tiranë.

Lushtaku, përmes një postimi në Facebook, ka shkruar se  një lajm i tillë është i pavërtetë dhe me të dhëna gjysmake.

Këto lajme, sipas tij, po bëhen për të dëmtuar imazhin e tij.

“Festimi ka lindur dhe është rritur në Shtutgart të Gjermanisë dhe atje ka kryer shkollimin e lartë. Përveç gjuhës amëtare, flet shkëlqyeshëm gjuhën gjermane dhe angleze. Për shumë vite ka punuar në Konsullatën e Përgjithshme të Kosovës në Shtutgart, prej nga është transferuar në Shqipëri, pas një vendimi të Ministrisë së Punëve të Jashtme të Kosovës, e cila i bën politikat në bazë të nevojave të saj”, ka shkruar Lushtaku./arbresh.info

Reagimi i plotë:

Të dashur miq,

Janë një numër i madh i mediave në Kosovë, që në vazhdimësi, përmes të dhënave gjysmake e të njëanshme, dezinformojnë me lajme të pavërteta për mua dhe për familjarë të mi, për rreth dy dekada me radhë. Duke mos dashur të merrem me këto dezinformime, është arritur nga ana e tyre që të krijojnë dëmtim të imazhit dhe personalitetit tim.

I tillë është edhe lajmi i fundit që lidhet me djalin e vëllait, Festimin, i cili së fundi është emëruar konsull në Shqipëri.

Festimi ka lindur dhe është rritur në Shtutgart të Gjermanisë dhe atje ka kryer shkollimin e lartë. Përveç gjuhës amëtare, flet shkëlqyeshëm gjuhën gjermane dhe angleze. Për shumë vite ka punuar në Konsullatën e Përgjithshme të Kosovës në Shtutgart, prej nga është transferuar në Shqipëri, pas një vendimi të Ministrisë së Punëve të Jashtme të Kosovës, e cila i bën politikat në bazë të nevojave të saj.

Në të kaluarën, vetëm UDB-ja famkeqe serbe propagandonte për mua dhe familjen time, e që fatkeqësisht, siç duket, ka ende mbetje të saj në Kosovë, që dezinformojnë për mua dhe familjen time.

Tash e tutje, do të ngre padi ndaj çdo lajmi i cili është i pavërtetë dhe njollosë dinjitetin tim dhe të familjes. SL