Adnan Rrustemi, përfaqësuesi i LVV-së në KQZ, ka thënë se procesi i numërimit të votave me postë të ardhura nga jashtë Kosovës ka shkuar mirë.

Ai thotë se procesi i përfshirjes së bashkatdhetarëve në zgjedhje është proces shumë kompleks, ndërsa thekson se duhet thjeshtuar procedura e votimit dhe ajo të bëhet nëpër Ambasada dhe Konsullata nëpër shtete të ndryshme të botës.

Zyrtari i LVV-së shprehu keqardhjen dhe mospajtimin që mbi 4500 zarfe me fletëvotime të ardhura nga jashtë nuk janë pranuar me arsyetimin se kanë ardhur me disa ditë vonesë.

“Mospërfshirja e tyre është padrejtësi ndaj bashkatdhetarëve të regjistruar për të votuar. Ata kanë të drejtë vote, ndërsa konsideroj se u është mohuar kjo e drejtë kushtetuese. KQZ-ja ka pasur edhe hapësirë edhe bazë ligjore që t’i numërojë ato vota si të rregullta”, u shpreh Rrustemi për KTV-në.

Rrustemi tha se numri fillestar i votave me kusht është përafërsisht 26 mijë, por ato vota duhet të verifikohen për t’u parë a janë të rregullta. Ndërsa pas këtij procesi, vjen lista përfundimtare e votave me kusht.

Ai nuk deshi të parashikojë se sa prej këtyre votave mund t’i shkojnë Vetëvendosjes, por tha se në bazë të rezultateve të deritanishme, mund të ndodhë që një numër i konsiderueshëm i votave me kusht do t’i shkojnë partisë fituese.

Rrustemi tha se me numërimin e votave me postë të ardhura nga jashtë Kosovës, nuk pritet të ketë ndryshime të mëdha dhe tha se rezultatet janë përafërsisht ato që kanë dalë nga KQZ-ja në numërimin preliminar./ktv/