Rastet e para me coronavirus, i cili u shfaq në Kinë, tashmë janë paraqitur edhe në Evropë. Për shkak të gjendjes alarmante dhe numrit të madh të të prekurve edhe institucionet shëndetësore në vend janë bërë gati për kontrollin e gjendjes.

Drejtori i Institutit Kombëtar të Shëndetësisë Publike, Naser Ramadani, për arbresh.info, thotë se Kosova është e rrezikuar njësoj si nga shtetet e tjera, por rrezikshmëria është e ulët.

“Kosova si çdo vend tjetër është e rrezikuar nga coronavirusi, por rrezikshmëria është e ulët. Instituti Kombëtar është i gatshëm për menaxhimin e të gjitha rasteve dhe përcjelljen e situatës epidemiologjike. Instituti do të informojë rregullisht Institucionet shëndetësore, Ministrinë e Shëndetësisë, Qendrën e Situatave dhe OBSh-në, për ecurinë epidemiologjike të Novel coronavirus (2019-nCoV) në Republikën e Kosovës”, është shprehur Ramadani.

Ramadani thotë se në shkaqe gatishmërie po qëndron edhe një staf mjekësor në Aeroportin Ndërkombëtar të Prishtinës “Adem Jashari”.

“Në aeroportin e Prishtinës, janë duke qëndruar ekipi mjekësor i aeroportit, të ndihmuar dhe të udhëzuar nga ekipi i epidemiologëve të Institutit Kombëtar, të cilët janë duke e bërë diagnostikimin e udhëtarëve, përmes matjes së temperaturës në distancë. Ka shumë pak informacion për këtë virus, nga zyrtarët e vendit të origjinës”, tha ai.

Tutje ai tregon edhe disa nga masat e parandalimit të pneumonisë me coronavirus.

“1. Shmangni kontaktin e ngushtë me njerëzit që vuajnë nga infeksione akute të frymëmarrjes. 2. Lani shpesh duart me ujë e sapun 20-30 sekomda, veçanërisht pas kontaktit të drejtpërdrejtë me njerëzit e sëmurë ose në vendqëndrimin e tyre. 3. Shmangni prekjen e fytyrës dhe mbuloni gojën dhe hundën me faculetë, me mëngë ose parakrahë gjatë kollës dhe teshtitjes. Hidhni faculetat e përdorura në shportën më të afërt të mbeturinave. 4. Nëse keni ethe, kollë dhe vështirësi në frymëmarrje kërkoni menjëherë ndihmë mjekësore dhe tregoni historinë eventuale të udhëtimit jashtë vendit. 5. Personat e sëmurë duhet të qëndrojnë në shtëpi në mënyrë që të parandalohet përhapja e sëmundjes. 6. Evitoni vendet e mbyllura dhe të mbi populluara me njerëz”, ka thënë Ramadani.

Por rreziku për këtë virus mbetet akoma, pasi që në Aeroportin e Prishtinës arrijnë numër i madh i udhëtarëve nga vende të ndryshme, e që mund të jenë të prekur nga ky virus.

“Ne nuk kemi fluturime direkte për në Kinë”, ka deklaruar zëdhënsja e Aeroportit, Valentina Gara.

Ndryshe, coronavirusi deri më tani ka marr mbi 130 jetë në Kinë, ndërsa janë sëmurë mijëra të tjera.

E, përderisa nuk ka ende asnjë dyshim për ndonjë rast të prekur me virusin e ri, në Kosovë vazhdon të jetë i pranishëm gripi sezonal, influenca A.

Numri i të vdekurve nga gripi sezonal me influencë A ka shkuar në katër persona në Kosovë. /arbresh.info/