Ish deputeti Fatmir Rexhepi, ka thënë se LDK si partia më e madhe në vend dhe me historinë më të shëndoshë 30 vjeçare të aktiviteteve të saj demokratike dhe organizative, ka dëshmuar se është vetë projekti i ndërtimit të një shteti demokratik dhe euro-atlantik.

Në një shkrim në Facebook, ka thënë se çdo figurë historike e kombëtare e popullit tonë ka një lidhje te ngushtë me frymën dhe qëllimin që LDK mbarte ndër vite, për liri dhe Pavarësi, duke e pasuruar këtë histori më emra shumë të mëdhenj nga jeta politike dhe ajo e rezistencës së organizuar.

“Sot,  LDK edhe pse e lënduar rëndë nga votuesi i saj, nëse reformohet në hap me kohën do vazhdoj të mbetet ndër faktorët më të rëndësishëm të ndërtimit të shtetit ligjor, demokracisë dhe ardhmërisë më të mirë për brezat e rinj si dhe proceseve të reja të integrimit të vendit tonë”, tha ai.

Sipas tij, ky pozicion i rëndësishëm politik por vetëm me udhëheqje reformuese në menaxhim të partisë mundëson pajtim dhe unifikim të të gjithë anëtarësisë, bashkëveprimtarëve dhe brezave të cilët  sipas tij duhet të japin gjithçka nga vetja e tyre vetëm e vetëm që LDK të ruhet si shtëpia e një familje demokratike dhe besnike ndaj proceseve demokratike dhe miqve të saj historik, transmeton telegrafi.

“Tradicionalisht LDK është përkrahur nga të gjithë pa marrë parasysh moshën, gjininë apo përkatësinë fetare, sepse ajo udhëhiqej nga një njeri strateg dhe i qetë i cili përveç backgroundit akademik e kishte edhe konsistencën e qëndrimeve për çdo zhvillim politik”, thekson tutje.

Më tej thotë se dita e 14 marsit ndoshta vendimtare për të ardhmen e LDK-së, fati i saj është në duar dhe vullnetin e kuvendareve të saj.

“Kështu, populli me dekada çmoi dhe e vlerësoi liderin e saj historik dhe partinë si të besës dhe shpresës! Pra, në LDK janë ndërtuar njëherë e përgjithmonë shinat mbi të cilat jo çdo lloj drejtues treni mund të lëviz sepse duhet të plotësoj kriteret bazë për të cilat populli si kontribuuesi më i madh i kësaj lëvizje i ka vendosur me kohë, kështu mashtrimet me vullnetin e votuesit duhet të marrin fund dhe nuk duhet të përsëriten për hir të karriges dhe pushtetit vetanak”.

“Mesazhi im si delegat është për kuvend dhe proces demokratik ku në garë për lider do nominohen kuadro elitare dhe tradicionalisht  me profil reformuesi.  Prandaj, vetëm formati reformues garanton  sukses në menaxhimin e mirë dhe rikthimin e LDK-së.  Por, nëse në kuvend ndodh e kundërta që me bedel dhe pa procedura demokratike të bëhet imponimi dhe zgjedhja e lidershipit atëherë kuvendi do të dështoj në misionin e tij bashkë me të ardhmen e LDK-së, të cilën unë nuk do ta dëshiroja. Me reformuesit – për unitet dhe sukses”, shkroi në fund.