Prokurorja jep detaje për grabitjen në Suharekë: Janë bllokuar rrugët, po kontrollohen edhe ato dytësore

20:55 | 22 Nëntor 2023
E.G

Prokurorja Ervehe Gashi tha se po vazhdon operacioni për kërkimin e katër të dyshuarve për grabitjen e armatosur në Suharekë dhe me këtë rast janë bllokuar rrugë, ndërsa po kontrollohen rrugët dytësore.

“Jemi në kërkim e sipër të tyre, i kemi blloku rrugët, janë duke i kontrollu rrugët dytësore, rrugët magjistrale, autostradën, rrugët e fshatrave, rrugët lokale që lidhin fshat më fshat”, tha prokurorja Gashi për “Betimi për Drejtësi“.

Ajo shtoi një polic është plagosur me armë zjarri, ndërsa një tjetër u lëndua gjatë rezistencës, ndërsa të dy janë jashtë rrezikut për jetë.

Prokurorja Gashi ka bërë të ditur se shuma e arit të grabitur nga grabitja e armatosur në argjendari në Suharekë, konsiderohet të jetë 250 mijë euro.

Ndërsa, Shaqir Bytyqi, zëdhënës i Policisë për rajonin e Prizrenit, konfirmoi se Policia e Kosovës ka vënë në zbatim “unazën e çeliktë” (operacion i gjerë), për të kapur katër të dyshuarit për grabitjen e armatosur në argjendarinë në Suharekë.

Shpërndaje në rrjete sociale

Lajmet më të lexuara

Të ngjashme

Foto lajm