Prokuroria Themelore e Prishtinës ka kërkuar caktimin e masës së paraburgimit ndaj 12 zyrtarëve të Administratës Tatimore të Kosovës dhe një biznesmeni, që u arrestuan të marten gjatë një aksioni që u zhvillua në disa lokacione.

Lajmin për Arbresh.info e ka konfirmuar zëdhënësja e e Prokurorisë Themelore të Prishtinës, Laureta Ulaj.

“Ju njoftojmë se Prokurori i Shtetit ka paraqitur kërkesë për caktimin e masës së paraburgimit ndaj 13 personave të ndaluar në gjykatën kompetente”, deklaroi ajo.

13 personat e arrestuar në aksionin e djeshëm, dyshohen për veprën penale “Mashtrim në detyrë”.

Policia e Kosovës ka kryer dje bastisje në dy lokacione, përkatësisht në qytetin e Podujevës dhe Prizrenit, me ç‘rast janë arrestuar 13 persona, 12 prej tyre zyrtarë të ATK-së dhe një pronar i një biznesi, si dhe dy persona të tjerë janë në kërkim

Prokuroria Themelore në Prishtinë njofton se personat me inicialet M.Z., N.B., S.T., A.J., M.R., M.Z., M.B., G.Gj., A.P., V.K., A.R., Xh.H., zyrtarë të ATK-së, dyshohen se në bashkëkryerje kanë kryer veprën penale “Mashtrimi në detyrë”, nga neni 419 i KPRK-së, ashtu që të dyshuarit F.P., pronar i tri bizneseve në Prizren ia kanë njohur si të rregullta 23 fatura fiktive me vlerë prej 18 milion euro, kinse për ndërtimin e një hoteli i cili veç ka qenë i ndërtuar më parë, e të cilat fatura i kishte pranuar nga të pandehurit të B.B. dhe B.B ( të cilë janë në kërkim) pronarë të një biznesi në Podujevë, e që dyshohen se në bashkëkryerje kanë kryer veprat penale “Dokumentet e rrejshme lidhur me tatimin” dhe “Shmangie nga tatimi” dhe si rezultat i këtyre veprimeve, zyrtarët e ATK-së i kanë njohur të drejtën e rimburisimit të TVSH-së së zbritshme në shumën prej 2.8 milion euro për çka ekziston edhe një Urdhër i Përmbaruesit Privat për rimbursim të detyruar nga Buxheti i Kosovës, por se kjo procedurë është pezulluar në momentet e fundit për shkak të inicimit të rastit penal ndaj të pandehurve të lartcekur.

Andaj, B.B., F.P. dhe B.B., pretendohet se me veprimet e tyre e kanë dëmtuar buxhetin e Kosovës në vlerë prej 2.8 milion euro.

Prokurori i Shtetit ka lëshuar aktvendim mbi ndalimin e të dyshuarve në kohëzgjatje prej 48 orësh, si dhe për të njëjtit do t’i ndërmerre veprimet e mëtejme ligjore.

Ndërsa, gjatë kontrollit në objektet e kontrolluara tek i pandehuri F.M janë gjetur dhe konfiskuar një sasi armësh, tri të gjata, tri të shkurtra, pajisje elektronike, telefon e prova të tjera materiale.

Në njoftim më tej thuhet se Prokuroria në koordinim me policinë do të vazhdojë me ndërmarrjen e veprimeve hetimore lidhur me këtë rast./Arbresh.info

LEXO EDHE:

Arrestohen 12 zyrtarë të ATK-së, ia njohën si të rregullta faturat fiktive në vlerë prej 18 milionë euro një biznesmeni në Prizren