Një ditë pasi që OVL e UÇK-së bëri të ditur se Policia e Kosovës, gjëgjësisht njësitë regjionale për hetimin e krimeve ekonomike kanë filluar t’i marrin në pytje disa persona të cilët dyshohet për falsifikim të dokumenteve për statusin e veteranëve dhe invalidëve të luftës, Prokuroria e Shtetit ka konfirmuar për disa raste të kësaj natyre në tri komuna.

Bazuar në hetimet e Prokurorisë, të cilat kanë nisur rreth një vit më parë, Komuna e Prizrenit prinë me numrin e atyre që dyshohet se kanë qenë të përfshirë në dallaverët me lista të veteranëve dhe invelidëve të luftës.

Pas kësaj komune, radhitet ajo e Ferizajit ku Prokuroria Themelore e po kësaj komune është duke e mbajur në procedur të hetimit një person. Ndërkaq në Gjakovë, Prokuroria Themelore ka arritur t’i sigurojë tri informata lidhur me rastin në fjalë.

Ekrem Lutfiu, zëdhënës i Këshillit Prokurorial të Kosovës, i ka thënë “Blic” se është vetëm Komuna e Pejës ajo në të cilën Prokuroria Themelore e të njëjtës komunë gjatë hetimeve të bëra nuk ka rastisur në asnjë parregullësi lidhur me fasifikimin e dokumenteve për statusin e veteranëve dhe invalidëve të luftës.

“Prokuroria Themelore në Ferizaj ka një rast i cili është në procedurë;

Në Prokurorinë Themelore në Prizren janë të regjistruara tri (3) lëndë ndaj katër (4) personave;

Prokuroria Themelore e Gjakovës deri më tani ka tri (3) informata të cilat janë në verifikim e sipër.

Në Prokurorinë Themelore të Pejë nuk ka asnjë rast”, ka thënë Lutfiu, përmes postës elektronike.

Kurse nga Prokuroria Themelore e Prishinës, ajo e Gjilanit dhe Mitrovicës, ky zëdhënës i KPK-së mohon se kanë marrë informata lidhur me rastin.

Ndryshe, dyshimet për fryrje të listave me veteranë të UÇK-së nga përfaqësues të organizatave të dala nga lufta, kanë qenë pikënisje e hetimeve nga ana e prokurorisë.

Numëri i madh i veteranëve ka rrezikuar edhe buxhetin e Kosovës, madje në vitin e kaluar kjo kategori për disa muaj rresht ka marrur pensionin e saj më vonesë.