Nuk pritet ndonjë dakordim konkret në takimin e radhës ndërmjet kryeministrit Albin Kurti dhe presidentit serb, Aleksandër Vuçiq, që është paralajmëruar se do të mbahet në javën e tretë të gushtit.

Ky takimi ishte kërkesë e shefit të diplomacisë së BE-së, Josep Borrell, pas tensioneve në veriun e Kosovës.

Njohës të çështjeve politike e vlerësojnë se ky takim është i domosdoshëm pas zhvillimeve në veri të vendit.

Ardiana Thaçi, njohëse e rrethanave politike në vend, nuk është optimiste në atë që pritet të ndodh në takimin mes Kurtit dhe Vuçiqit, për faktin se tashmë dihen qëndrimet e të dyja palëve.

Thaçi nuk pret se do të ketë ndonjë zgjidhje për faktin se Vuçiqi ka thënë se nuk do të ketë lëshime përderisa në krye të qeverisë është Kurti.

“Ajo që e kam parë si pozitive ka qenë fakti i involvimit të NATO-s apo deklarimet që kanë ardhur nga gjeneralët që e kanë paralajmëru Serbinë që Kosova nuk mund të preket, në aspektin e sigurisë kjo është një gjë që është bërë si siguri tek ne shqiptarët, që Kosova nuk mund të ketë një konflikt të ri me Serbinë, sa i përket çështjes së veriut dhe vendosjes së politikave të reja”, vlerëson Thaçi dhe beson se edhe Shtetet të Bashkuara të Amerikës, do të kënë një pjesëmarrës në këto bisedime për faktin se ishin ata të cilët e shtynë marrëveshjen ose vendimin e qeverisë për 30 ditë.

E analisti, Gazmir Raci, mendon se çështje kryesore e këtij takimi do të jetë shtensionimi i raporteve Kosovë- Serbi, si angazhim drejt një marrëveshje përfundimtare.

“Kjo do të jetë qëllimi i këtij takimi të ardhshëm, dhe natyrisht që me shku drejt finales në dialog”, thotë Raci për arbresh.info.
Kurti dhe Vuçiq kanë konfirmuar pjesëmarrjen në takimin e përbashkët në Bruksel.

Zëdhënësi i BE-së, Peter Stano, ka thënë se BE-ja është në kontakt të afërt me Kosovën dhe Serbinë për të qetësuar situatën dhe është në koordinim të afërt me EULEX-in, KFOR-in e partnerët e tjerë, posaçërisht SHBA-në. /Kujtesë Berisha /arbresh.info/