Presidenti i Serbisë, Aleksander Vuçiq është takuar sot me homologun e tij ukrainas, Petro Poroshenko.
Temë diskutimi e takimit të dy presidentëve ishte edhe çështja e Kosovës, për të cilën Ukraina tashmë i ka qëndrimet e ditura në kundërshtimin e shpalljes së pavarësisë.

Vuçiq pas këtij takimi tha se shteti i tij dëshiron që të gjitha problemet në Ukrainë të zgjidhen në mënyrë paqësore, duke potencuar edhe përkrahjen e presidentit ukrainas që Serbia të arrijë sa më shpejtë një zgjidhje me Kosovën, shkruan lajmi.net.

Sipas tij, Ukraina e ka këtë pozicionim karshi Kosovës për arsye se edhe Serbia gjithmonë e ka respektuar integritetin territorial të Kievit zyrtar.

Nga ana tjetër, Poroshenko tha se Ukraina megjithëse i qëndron vendimit për të mos ta njohur pavarësinë e Kosovës, dëshiron që Beogradi dhe Prishtina të arrijnë sa më shpejtë një kompromis.

“Dua ta bëj të qartë se ne respektojmë integritetin territorial të Serbisë. Ne nuk e e kemi njohur Kosovën sepse kemi marrë pozicionimin e tillë që kjo të zgjidhet përms një kompromisi mes palëve, duke respektuar edhe interesat e Serbisë”, u shpreh Poroshenko.

Vlen të theksohet se njëra ndër arsyet se pse Ukraina nuk e ka njohur ende pavarësinë e Kosovës, është edhe territori i Krimesë, rajon ky i kontestueshëm mes palës ruse dhe asaj ukrainase tash e një kohë të gjatë.