Drejtori i Përgjithshëm i Policisë së Kosovës (PK-së) z. Rashit Qalaj, nën shoqërimin e zyrtarëve të lartë të PK-së dhe OSBE-së, po qëndron për vizitë zyrtare në Vienë të Austrisë.

Sipas njoftimit të Policisë së Kosovës ky takim po mbahet në kuadër të agjendës zyrtare, ku sot  ka vazhduar realizimin e takimeve, fillimisht  me drejtorin e Byrosë Federale Austriake të Antikorrupsionit  Andreas Ëieselthaler me bashkëpunëtorë, pastaj edhe Drejtorin e Agjencionit Federal të Inteligjencës Kriminale z. Michael Fischer, i cili shoqërohej edhe nga Shefi i Interpolit Austriak, z. Rudolf Gross.

“Gjatë takimit të parë me z. Andreas Ëieselthaler u diskutuan çështje të interesit bilateral dhe u shkëmbyen përvoja dhe informacione të ndërsjella për situatën në të dyja vendet, si dhe masat që janë ndërmarrë në drejtim të hetimit dhe ndjekjes së veprave korruptive. Takimi u realizua në frymë miqësore me zotimin për vazhdimin dhe forcimin e mëtutjeshëm të bashkëpunimit ndërmjet dy vendeve në fushën e zbatimit të ligjit. Drejtori Qalaj falënderoi z. Andreas për mikpritjen dhe takimin mjaft frytdhënës”, thuhet në komunikatë.

Ndërsa në takimin e dytë të realizuar me Michael Fischer dhe Rudolf Gross, të gjithë bashkëbiseduesit konstatuan se ekziston nivel shumë i lartë i bashkëpunimit ndërmjet BKA-se dhe Policisë se Kosovës.

Drejtori Qalaj ka falënderuar  homologun e tij për ndihmën që BKA-ja i ka ofruar PK- së përgjatë këtyre viteve dhe e siguroj për përkushtimin e Policisë së Kosovës për zbatimin e ligjit në vend dhe vendosmërinë për të qenë partner i besueshëm për agjensionet e zbatimit të ligjit të shteteve mike.

“Të dy drejtoret u pajtuan se bashkëpunimi ndërkombëtar është krucial,  sidomos në fushën e luftimit të formave të ndryshme të krimit të organizuar dhe terrorizmit. Drejtori Fischer nga ana e tij  edhe njëherë theksoi përkushtimin e Austrisë për të mbështetur Policinë e Kosovës në përpjekjet e saj për anëtarësim në nisma dhe organizata ndërkombëtare policore”, thuhet tutje në njoftim.

Takimi rezultoi me zotimin për vazhdimin e bashkëpunimit të ngushtë dhe mundësinë e thellimit të këtij bashkëpunimi përmes operacioneve të përbashkëta policore dhe shkëmbimit të informacioneve të inteligjencës kriminale.

Policia e Kosovës falënderon  Misionin e OSBE-se në Kosovë, për mbështetjen dhe përkrahjen në realizimin e kësaj vizite./arbresh.info