Katër propozime, por asnjë dakordim në takimin e parë mes kryeministrit të Kosovës Albin Kurti e presidentit serb Aleksander Vuçiq në Bruksel.

Njëri prej propozimeve të kryeministrit Kurti qe për largim të Veljko Odaloviqit, nga pozita e kryesuesit për persona te pagjetur prej delegacionit serb.

Lidhur me këtë, për Klan Kosovën ka dhënë një vlerësim përfaqësuesi i familjeve kosovare të personave të pagjetur, Bajram Qerkini, i cili tha se nëse kryeministri Albin Kurti ka argumente se Veljko Odaloviq duhet larguar nga funksioni i tij, kjo duhet mirëpritur.

”Ne familjarët kemi thënë se edhe me dreqin e dreqit duhet biseduar për personat e pagjetur por edhe në qoftë Kasapi i Ballkanit, që ka qenë tmerr i Kosovës, edhe me të duhet të bëhet bisedë për personat e pagjetur për shkak se ata dinë dhe me ata duhet të ulesh të bisedohet”.

”Nëse Veljko Odaloviq din për personat e pagjetur plotë 21 vjet dhe nuk ka marrë asnjë politikanë asgjë ndaj tij, atëherë ka ardh koha t’i thotë dikush të largohet nga ky funksion se ti je ai që ke bërë”.

”Unë i kam thënë shpesh herë se ”ti i di të gjitha sepse ke qenë njësiti gjatë luftës për pastrimin e terrenit”, dhe duke qenë se ke pastru terrenet, e ke ditë edhe për trupat të cilët sot ne i kërkojmë”.

Është zotuar dhe ka thënë se ”nuk kam hasur në trupa” dhe ”nuk mund të them për asnjë varr masiv se e di ku është pa pasur dëshmitar”. Ai është zotuar disa herë, mirëpo nëse argumentet janë nga Albin Kurti, atëherë është e mirëseardhur dhe duhet që të largohet e t’i thuhet atij ”ti zotni nuk e ke vendin këtu” ”.

”Çka kam me propozu unë kryeministrit tonë [Albin Kurtit]?.Nëse flasin për të pagjeturit, e lutim që duhet të jetë një familjar që del para të gjithë familjarëve dhe ua sqaron në mënyrë më të detajuar atë çka e flasim ne familjarët mes veti, por jo çka e flasin politikanët”, tha Qerkini.