Numri i përdoruesve të drogës në Kosovë është në trend të rritjes, ndërsa konsumues gjithnjë e më të shpeshtë po bëhen adoleshentët.

Në Kosovë, aktualisht, nuk ka ndonjë qendër rehabilituese afatgjate, që do të ishte nën ombrellën e institucioneve shëndetësore të shtetit.

Adresë për ta nganjëherë është edhe Qendra Mediko-Psikoterapeutike Labirint, një organizatë jofitimprurëse me seli në Prishtinë.

Kjo qendër ofron programe ditore, nga mbështetja psiko-sociale deri te terapitë grupore.

Safet Blakaj nga kjo qendër për arbresh.info ka shprehur shqetësimin për moshën e re të përdoruesve, ai thotë se në katër vitet e fundit të rinjtë janë përdorues më së shumti të kokainës dhe kanabisit.

“Në katër e vitet e fundit të rinjtë e Kosovës janë përdorues më së shumti të drogës të llojit Kanabis dhe Kokainë. Një nga arsyet më të shpeshta mund të jetë dëshira për tu përshtatur me grupin, dikujt mund t’i duket interesante, prandaj edhe i përshtatet grupit. Ka shumë arsye që ka numër të madh të narkotikeve, nuk ka ndonjë arsye konkrete por mendoj që në Kosovë është dëshira për t’i takuar grupit, dikujt i duket interesante që një grup përdor këto lloj substancash dhe i afrohet atij grupi.”, thotë ai.

Tutje ai shprehet së gjatë stinës së verës, personat e varura nga këto substanca përdorin edhe droga të tjera, e që ndryshe quhen edhe droga të klubeve, dhe disa droga të tjera.

“Gjatë stinës së verës ku ka organizime të shumta, personat që janë të varur nga këto substanca përdorin edhe droga të tjera, e që ndryshe quhen edhe droga të klubeve, dhe disa droga të tjera. Nuk ka droga të lehta e të rënda, edhe marihuana kur përdoret në mënyrë të rëndë është e rëndë”, përfundoi ai.

Ndërkohë, në nëntë mujorin e këtij viti Policia e Kosovës ka sekuestruar mbi 226 gramë kanabis, dhe mbi tre kilogramë kokainë.

Ndërsa, droga që është sekuestruar më së shumti ketë vit nga Policia e Kosovës, është droga e llojit marihuanë me mbi 595 kilogramë.

Kujtojmë se, në Kosovë llogaritet se janë rreth 30 mijë përdorues të substancave narkotike. /Kujtesë Berisha/arbresh.info/

Më poshtë mund ta gjeni tabelën me statistika sa i përket sekuestrimit të substancave narkotike, të dërguar nga Policia e Kosovës për arbresh.info.