Partia e Serbëve të Kosovës ka reaguar ashpër ndaj procesit zgjedhor më 14 shkurt dhe siç i ka quajtur ajo ‘vjedhjes së paskrupullt’ të votave në mjediset me shumicë serbe.

Ky subjekt politik, i cili nuk mori pjesë në zgjedhjet për Kuvendin e Republikës së Kosovës më 14 shkurt, e ka quajtur tradhti faktin që qytetarët serbë kanë votuar për Iniciativën qytetare boshnjake të Adriana Hoxhiqit.

Po ashtu, kjo parti vlerëson se tashmë me këtë veprim të Listës Serbe, iu ka dhënë e drejta e pamohueshme partive shqiptare që në të ardhmen të kenë listat e preferuara të serbëve dhe ta delegojnë votën shqiptare tek ato lista, në mënyrë që të eliminojnë nga skena politike partitë autentike serbe.

Reagimi i plotë i Partisë së Serbëve të Kosovës:

Rezultati përfundimtar i zgjedhjeve të parakohshme të mbajtura të dielën më 14 shkurt, si dhe të gjitha veprimet e kryera para dhe në ditën e zgjedhjeve, janë konfirmimi më i mirë se vendimi i Partisë së Serbëve të Kosovës për të mos marrë pjesë në procesin zgjedhor, është i saktë dhe vetmi që i shkon logjikës.

Të dielën më 14.02.2021, ne ishim dëshmitarë të një vjedhjeje të paskrupullt të votave dhe inxhinierisë elektorale në mjediset serbe në Kosovë. Pjesëmarrja që ishte më e madhe sesa në Korenë e Veriut apo Bjellorusi konfirmoi këtë herë se vjedhja e votave ishte më e fortë se “Institucionet Demokratike të Kosovës “.

Veçanërisht është shqetësuese që në mjediset serbe me mijëra vota i janë dhënë një liste zgjedhore joserbe (Ujedinjena zajednica Adriana Hodžić’). Kjo vjedhje e paskrupullt e kryer nga Lista Serbe dhe anëtarët e saj në komisionet zgjedhore, dhe dhënia e votave serbe një liste boshnjake është tradhtia më e madhe që u është bërë serbëve në Kosovë dhe flet për humbjen totale të ndjenjës dhe moralit në “udhëheqësin” e Listës Serbe.

Ata të cilët pa asnjë provë i shpallën vazhdimisht tradhtarë të ndjerin Oliver Ivanoviq, Aleksandar Jablanoviqin, Slobodan Petroviqin, Nenad Rashiqin, Rada Trajkoviqin dhe shumë të tjerë, duke pretenduar se këta njerëz do t’i merrnin votat e shqiptarëve, gjë e cila nuk ka ndodhur asnjëherë dhe askund… Kësaj radhe kryen tradhtinë më të madhe ndaj popullit të ‘tyre’, duke i dhënë vota Adriana Hoxhiqit, e cila gjithashtu fyeu dhe mashtroi të gjithë boshnjakët në Kosovë, duke pranuar një lojë të tillë të Listës Serbe dhe votat e vjedhura serbe, nga të gjitha ato vendvotime, ku kurrë s’ka jetuar ndonjë boshnjak.

“Djalli nga shishja doli” dhe partive shqiptare tani iu është dhënë e drejta të kenë “listat e tyre serbe” në zgjedhjet e ardhshme, të cilave do t’ia japin votat shqiptare dhe kështu mundësisht të nxjerrin jashtë skenës politike partitë autentike serbe.

Në ditët dhe javët e ardhshme, Partia e Serbëve të Kosovës do të fillojë një aksion politik për të përcaktuar ekzekutuesit e kësaj vjedhjeje zgjedhore në mjediset serbe dhe ne do të kërkojmë një reagim adekuat nga institucionet kompetente ose në fund të fundit, listën e popullsisë së regjistruar në shumicën e mjediseve serbe. Le të përcaktojmë një herë e mirë, pa mashtrime dhe keqkuptime, se sa prej nesh jetojnë këtu me të vërtetë dhe në të njëjtën kohë sa boshnjakë jetojnë në mjediset me shumicë serbe.