Zëvendëskryeministri Behgjet Pacolli ka informuar Qeverinë e Kosovës për krijimin  Grupit Punues për Koordinimin dhe Mbështetjen e Procesit të Anëtarësimit të Republikës së Kosovës në Këshillin e Evropës.

Ai ka thënë se ka autorizuar dhe i ka dhënë udhëzimet e nevojshme këtij Grupi Punues, që të përgatisë një Plan Veprimi për masat, që duhet të ndërmerren nga të gjitha Institucionet e linjës, përkitazi me këtë proces.

Statusi i plotë:

Në mbledhjen e rregullt të Qeverisë informova kabinetin mbi krijimin e Grupit Punues për Koordinimin dhe Mbështetjen e Procesit të Anëtarësimit të Republikës së Kosovës në Këshillin e Evropës.

Në funksion të këtij qëllimi dhe në përputhje me mandatim tim si Minisitër i Jashtëm kam krijuar Grupin Punues prej 11 anëtarëve, i cili do të vendosë bazamentin fillestar të këtij procesi shumë të rëndësishëm për vendin dhe të gjithë shtetasit e vendit tonë.

Kam autorizuar dhe i kam dhënë udhëzimet e nevojshme këtij Grupi Punues, që ndër të tjera, të përgadisë një Plan Veprimi për masat, që duhet të ndërmerren nga të gjitha Institucionet e linjës, përkitazi me këtë proces.

Në bazë të dinamikës të punës, në një afat shumë të shpejtë Republika e Kosovës do të dorëzojë edhe zyrtarisht aplikimin për të qenë pjesë e këtij mekanizmi ndërkombëtar.

Veç kësaj, jam duke e koordinuar ngushtë çështjen e anëtarësimit të Republikës së Kosovës në Interpol. Grupi Punues, ndër-ministror, që mbështetet edhe nga Ministria e Punëve të Jashtme është duke punuar intenzivisht, që procesi i anëtarësimit të Republikës së Kosovës në Interpol të ndodhë sa më shpejtë që të jetë e mundur.

Ashtu siç edhe jeni në dijeni nga vizitat e mia të shumta në çdo cep të botës, fuqizimi i subjektivitetit ndërkombëtar dhe anëtarësimi i vendit tonë në sa më shumë organizata ndërkombëtare është njëri ndër prioritetet e mia qeverisëse për këtë mandat, por edhe i Qeverisë së Republikës së Kosovës.