Ministri i Jashtëm i Kosovës, Behgjet Pacolli, ka reaguar për rastin e të miturës në Drenas.

Pacolli përmes një postimi në facebook ka shkruar se është i alarmuar, shkruan arbresh.info.

“I alarmuar nga rasti i sotshëm monstruoz i shkeljes së dinjitetit dhe i fyrjes që i bëhet vlerave e traditës sonë, si dhe cënimit të vet themeleve ligjore e institucionale nuk mund të qëndroj indiferent nga ajo çfarë pamë e dëgjuam sot”, ka shkruar Pacolli.

Ai po ashtu ka propozuar formimin e një liste publike të ofenduesve seksual.

“Rasti i nëpërkëmbjes dhe cënimit deri në skllavërim, i një vajze 16 vjeçare, dëshmon dështimin e një morie institucionesh, prandaj së shpejti do të propozoj që sikurse në botën e civilizuar dhe demokratike, këta shkelës monstruoz dhe kushdo që guxon të prek nderin dhe moralin e tjetrit, të konfirmuar me vendim nga një gjykate, me automatizëm të figuroj në një listë publike të ofenduesve seksual. Atyre do t’ju ndalohej ushtrimi i çfardo roli a pozite zyrtare. Madje një listë dhe masë e ngjashme, do të duhej t’i nxirrte siç janë, edhe ata që dënohen për korrupsion”, ka shkruar ai.

“Kupa është mbushur, duhet veprim urgjent institucional!”, ka përfunduar Pacolli.

Ndryshe për rastin e të miturës në Drenas gjatë ditës kanë reaguar të gjithë krerët e shtetit.

Ata kanë kërkuar që drejtësia të vihet në vend teksa janë shprehur të shokuar me rastin./Arbresh.info/

Lexo edhe: Lladrovci deklarohet për rastin e të miturës