Presidentja Kosovës, Vjosa Osmani ka mbajtur fjalimin përmbyllës në Samitin e Paqes për Ukrainën në Zvicër ku morën pjesë liderë nga 100 shtete të të gjitha kontinenteve.

Në fjalën e saj, Osmani tha se përgjatë historisë, lavdia e njerëzimit është përcaktuar nga guximtarët.

“Këta individë na kujtojnë se triumfet tona më të mëdha nuk vijnë nga fuqia, por nga aftësia jonë për të nxitur shpresën, dhembshurinë dhe unitetin”, u shpreh ajo.

Osmani theksoi se agresioni rus ndaj Ukrainës i ka kujtuar popullit të Kosovës vuajtjet e pafundme që sjell lufta.

Mes të tjerash, Osmani ka thënë se në ato ditë të vështira bota u bashkua për t’i dalë në ndihmë popullit të Kosovës, derisa sipas saj tash është koha që Kosova të bashkohet në përpjekjet për liri për popullin e Ukrainës.

“Në ditët më të vështira për popullin tonë, shtetet demokratike na erdhën në ndihmë duke dërguar sinjal të qartë se nuk do të lejojnë shtypjen e shfarosjen e një populli që luftonte për lirinë e vet. 25 vite pas Kosova është pjesë e aleancave që po mbrojnë vlerat e lirisë”, ka deklaruar Osmani.

Ajoi shtoi se nuk duhet të këtë afate kohore për të vendosur sovranitetin e Ukrainës.

“Si një vend i shkatërruar nga vuajtjet e luftës, dua të theksoj se ky moment kërkon që ne të qëndrojmë të vendosur, duke u siguruar që angazhimi ynë të mos matet me ditë apo muaj, por në qëndrueshmërinë e mbështetjes sonë derisa të rivendoset sovraniteti i Ukrainës dhe të mbizotërojë paqja e drejtë”, tha presidentja Osmani.

Ndër të tjera, Osmani tha se kjo luftë është beteja për vlerat tona të përbashkëta duke theksuar mbëeshtetjen që i është ofruar Ukrainës.

“Kjo luftë nuk është vetëm lufta e Ukrainës. Është beteja për vlerat tona të përbashkëta dhe idealet që sot janë nën rrethim, por janë po aq të qëndrueshme sa shpirti i atyre që i mbrojnë. Ne i kemi ofruar Ukrainës mbështetje në të gjitha frontet, nga dimensioni njerëzor deri te ndihma ushtarake”, ka deklaruar tutje Presidentja./Arbresh.info/