Oda Ekonomike Amerikane në Kosovë përmes një komunikate për media kanë reaguar lidhur me zhvillimet e fundit në vend, saktësisht me vendimin për taksën, duke kërkuar nga qeveria heqjen e kësaj mase.

“Oda Ekonomike Amerikane në Kosovë shpreh shqetësimin e saj lidhur me diskursin e ditëve të fundit rreth tarifës që Republika e Kosovës i ka vendosur dy shteteve të Ballkanit Perëndimor. Barrierat tarifore që shtetet e këtij rajoni i vendosin njëra tjetrës, pengojnë qarkullimin e lirë të mallrave dhe njerëzve, e rrjedhimisht ngadalsojnë avancimin e rrugëtimit të tyre euro-atlantik. Në këtë aspekt shfuqizimi pa kushte i vendimit për tarifën në përputhje me kërkesën e Presidentit Trump, Sekretarit të Shtetit Pompeo, zyrtarëve të tjerë të lartë të administratës amerikane, si dhe Ambasadës së SHBA-së në Kosovë, është i një rëndësie imperative, si dhe dëshmi e përkushtimit për marrëdhënie të jashtëzakonshme me Shtetet e Bashkuara të Amerikës”, shkruhet në komunikatë.

Tutje, nga Oda Amerikane iu kanë rikujtuar institucioneve në vend, për rolin e Shteteve të Bashkuara në lirinë, pavarësinë dhe formimin e Shtetit të Kosovës, përmes investimeve të vazhdueshme për fuqizimin e ekonomisë, drejtësisë, qeverisjes demokratike dhe mbrojtjes e sigurisë.

“Një numër i kompanive amerikane kontribuojnë në mënyrë aktive në zhvillimin ekonomik të vendit në sektorë si ndërtimtaria dhe patundshmëria, energjia, shëndetësia, dhe teknologjia e informacionit. Në anën tjetër, Qeveria e Shteteve të Bashkuara të Amerikës i ofron Kosovës mbështetje direkte përmes Agjencisë së saj për Zhvillim Ndërkombëtar (USAID) si dhe Fondacionit të Sfidave të Mijëvjeqarit (MCC), ndërsa prodhuesit nga Kosova kanë mundësinë të eksportojnë mbi 3,500 produkte pa doganë në Shtetet e Bashkuara përmes Sistemit të Përgjithësuar të Preferencave (GSP). Shtetet e Bashkuara të Amerikës janë kontribuesi më i madh në forcat e KFOR-it, duke garantuar një mjedis të sigurt dhe liri për qytetarët e Kosovës, e që rrjedhimisht është edhe garanci e stabilitetit dhe sigurisë për investitorët e huaj. Në anën tjetër, Garda Nacionale e Ioëas vazhdon të ofrojë mbështetje për Forcën e Sigurisë së Kosovës në kuadër të partneritetit afatgjatë, duke ndihmuar Kosovën të kontribuojë në sigurinë dhe bashkëpunimin rajonal”, shkruhet tutje në komunikatë.

Oda Ekonomike Amerikane ka bërë të ditur se janë pro marrëveshjeve të nënshkruara ndërmjet autoriteteve të Kosovës dhe Serbisë për vendosjen e linjës ajrore, hekurudhore si dhe për investimet në infrastrukturën rrugore, me ndërmjetësimin e Shteteve të Bashkuara të Amerikës.

“Duke shprehur besimin e fuqishëm se heqja e tarifës hap rrugën për një marrëveshje përfundimtare të paqes që do të rezultonte në njohje reciproke, tregti pa barriera dhe fuqizim të lidhjeve ekonomike, të cilat në anën tjetër do të përmirësonin perceptimin për të dy shtetet në sytë e investorëve amerikanë dhe të tjerë të huaj”, shkruhet në njoftim.