Oda e Afarizmit të Kosovës përmes një reagimi për media është shprehur e shqetësuar me vonesat e lejimit të lëndës së parë.

Ata përmes këtij reagimi kanë kërkuar që të eliminohet procedurat sipas tyre burokratike, dhe t’i lejohet të gjithë prodhuesve futja e lëndës së parë ashtu siç parashihet me ligj, raporton lajmi.net.

Ky është reagimi i plotë i OAK:

Oda e Afarizmit të Kosovës është shumë e shqetësuar me vonesat e lejimit të lëndës së parë që është duke e bërë Ministri Hamza, ku deri më tani, sipas ATK-së janë liruar vetëm 23% të prodhuesve apo rreth 40 biznese nga rreth 170 aplikacione që kanë bërë kërkesë deri më tash.

OAK kërkon që urgjentisht të ndërprehet kjo procedurë burokratike dhe t’i lejohet të gjithë prodhuesve futjen e lëndës së parë siç e parasheh ligji të gjithë prodhuesëve.

OAK vlerëson se këto procedura nëse është e nevojshme do të duhej të kryhen vitin e kaluar për këtë vit dhe shpreh dyshim që kjo zvarritje është e qëllimshme dhe ndikon drejtpërdrejtë në mundësinë e ndërprerjes së punës së shumë fabrikave të cilat pas aplikimit të taksës 100 % nga kryeministri Haradinaj, prodhimi vendor është rritur dhe kërkesa për lëndë të parë është rritë shumëfish në krahasim me vitin e kaluar.

OAK kërkon nga Kryeminstri Haradinaj të ndërhyjë menjeherë duke marrë masa ndaj këtij Ministri i cili po tregohet shumë i papërgjegjshëm.

Arsyeja e kërkesës është ankesa e prodhuesve lidhur me lirimin nga TVSH-ja e lëndës së parë.

Çdo fillim të vitit, prodhuesit vendor obligohen të aplikojnë në ATK për lirim nga TVSH-ja për lëndën e parë të importuar, ndërsa pas aprovimit të saj fillon edhe zbatimi në Dogana. Vitet paraprake shqyrtimi i kërkesave është bërë për një periudhë më të shkurtë kohore, gjë që nuk i ka penguar bizneset në vazhdim të prodhimit.

Këtë vit bizneset po përballen me probleme pasiqë për shkak të mos shqyrtimit të këtyre kërkesave lënda e parë ka mbetur pa kaluar në Doganë dhe si pasojë bizneset po detyrohen të paguajnë për qëndrimin e kamionëve dhe frigoriferëve në terminale dhe po krijon edhe pengesa në prodhim.

Oda e Afarizmit të Kosovës kërkon që të përkrahen prodhuesit vendor, duke ju lejuar që të bëjnë futjen e lëndës së parë në Doganë derisa të shqyrtohen aplikacionet nga ATK-ja.

Gjithashtu, OAK kërkon që kjo procedurë të hiqet ashtuqë të mos obligohen bizneset të aplikojnë çdo vit.